ARATZ GIA TALDEA

Gabonak Belabaratzen

2012-01-12T18:56:00.000+01:00

URTE BERRI ON GUZTIOI!

Espero dugu oso ondo pasa izana eguberriak, guk ere oso ondopasa izan ditugu eta.

Aurreko 26tik 29ra Gabonetako irteeran Belabaratzen(Orereta) egon ginen. Ohiko moduan,Aratz osoa elkartu ginen hara joateko. Donostian trena hartu ondoren, Oreretatikoinez abiatu ginen aldapan gora Belararatzera.

Behin hanginela, lasai-lasai bazkaldu genuen. Irteera osoan zehar aktibitate asko egingenituen: Sukaldaritza tailerra (txokolatea eta erroskilak), zirkoaren munduaezagutu genuen, zine saioa, ibilalditxo bat San Markosera…

Talde egunean,Mari Domingi eta Olentzero bisitan etorri ziren Asolot izeneko herrira. Hangobiztanleak zaharrak ziren eta gabonetako espiritua gaduta zuten. Olentzerok etaMari Domingik laguntza eskatu ziguten Asoloten gabonak berpizteko.

Etxe askozeudenez, taldeka banatu ginen etxez etxe joateko. Ohitura den bezala, ateakirekitzeko gabonetako-kantak abestu genituen. Behin barruan ginela, etxekojabeak zeregin bat egiteko eskatzen zigun, horren truke puntu batzuk ematenzizkigun subasta batean parte hartzeko.

Bazkalduaurretik subastan, afarirako osagai goxuak lortu genituen, txaka, patea,urdaiazpikoa, atuna, artoa, gulak… hori bai ezustea gurea!!!! Mmmm ze onazegoen dena!

Arratsaldean,Oreretako ikastolako zelaira joan ginen gabonetako pinuak apaintzera, baina ezpentsa zuhaitz arruntak zirenik, mugitu egiten ziren eta gu beraien atzetikkorrika joan behar ginen. Bukatzeko etxera bueltatu ginen eta bertan, bi pinuezkutatuta zeudela esan zigun Olentzerok. Bilatu eta azkeneko apaingarriaitsatsi genien. Apaingarri gehien jarri zituen taldeak, opari handienak lortuzituen, baina lasai, denek genuen bat bakoitzarentzat. Irekitzeko orduan,papera puskatu eta, a ze nolako sorpresa, ez zegoen ezer!!! INUZENTEEEEINUZENTEEEE!!!

Gaubela berezibat izan zen niretzat, nire lehenengo “kotioia”!!! Musika, dantzak, atzerkiak,janaria eta edaria ez ziren falta.

Dudarik gabeireteera ezin hobea izan zen denontzat!

BUELTAN. Aratz hemen da berriz!!

2011-12-09T13:42:00.001+01:00

Urriaren 14ean Urnietara irteera egin genuen, kurtso berriari hasiera emateko, haur eta monitore berriei ongietorria emateko eta elkar ezagutzeko.

Aurreko urteko bost trebeetatik, lau, monitore taldera pasa dira gogo askorekin. Hauekin eta joan diren monitoreekin, aurten 17 gara.

Irteera guztietan bezala, Talde Eguna egin genuen baina, egun gutxiago zirela eta, bakarrik larunbateko arratsaldea eta gaubela iraun zuen.Gaur egun Zentral Nuklearrekin dagoen gatazka dela eta, Urnietako etxea zentral nuklear batean bihurtu genuen, umeei arazoari buruz kontzientziatzeko.

Taldeetan banatu genituen Turistak zirela esanez, batzuk "Enpresarioak" ziren, bete batzuk "Jubilatuak", "Txinatarrak" ere han zeuden eta nola ez "Ikasleak".Bat-batean zentral nuklearrean lan egiten zuen neska panpox bat azaldu zen eta instalazioak erakutsi ondoren, bideo informatibo bat jarri zien.Bideoa bukatzen ari zenean sirena bat entzun zuten, orduan langileak maskarilak banatu eta beraien zeregina azaldu zieten:

"Ezbehar bat gertatu da. Hau konpontzeko zuen laguntza behar dugu. Bi ordu dituzue sektore guztietatik pasatzeko eta barruan dauden frogak gainditu ondoren atea isteko. Laguntzaile bat duzue talde bakoitzerako, zentralaren mapa duena"

Denen lasaitasunerako, talde guztiak kutsatu gabe atera ziren.Gaiarekin jarraitzeko, gaubelan, bai umeak eta bai guk antzerkiak egin genituen. Denak desberdinak izan ziren arren, guztiekin ondo pasa genuen.

Hilabete bat pasa da Irteera hau egin genuenetik. Aurreko larunbatean bezala, honetan ere ikusiko gara elkar ondo pasatzeko. Oraingoz dena primeran doa, aurreikuspen asko ditugu aurtengo urterako eta espero dugu haurrak orain arte bezain gustora etortzen jarraitzea.

Laster arte!!!!

Irla eguna 2011, piratak Santa Klaran!!

2011-08-19T19:50:00.001+02:00

Grix

2011-08-19T18:50:00.003+02:00

2011ko aste santuan Beizamara joan eta bertan denboran atzerako bidaia egin genuen. 60 bat urte atzera egin eta 1950ko hamarkadan kokatu ginen, Estatu Batuetan hain zuzen ere. Tupeak, larruzko txupak, gona arroxak, kotxe azkarrak eta Rock'n Rolla!! Go Grix Lighting, Go!!

Aratz taldea ere... euskalakari!

2011-04-18T18:31:00.005+02:00

Atzo Korrika 17-ren amaiera ospatu genuen Donostian, eta beti egin ohi dugun moduan, Aratz taldeko kideok lekukoa eraman genuen eskuetan! Jai-alaitik Ategorrieta ingururaino joan ginen lekukoarekin, eta bertan hamaiketakoa antolatu genuen haur, guraso, lagun eta bixitari guztientzat (izerditutakoa errekuperatzeko asmotan). Bertan giro politean ospatu genuen aurtengo edizioa eta ondoren batzuek berriro heldu genion Korrikari zentro aldean, amaieraraino joan ginelarik euskararen alde!

Maitatu, ikasi, ari... euskalakari!

Aspaldiko partez!!

2011-03-15T20:41:00.011+01:00

Baina, baina... zer da hau?? Zeharo utzita daukagu bloga! Zer gertatzen da, Aratz taldeak ez duela ezer egin uztailako kanpalditik ala? Gezurra dirudi!
Ba bai, aspaldi hasi genuen kurtsoa, eta honez gero hainbat irteera, ekintza, bilera eta jolas egin ditugu! Fundamenturik ez duena bloga da, ez taldea! Dagoeneko ia Aste Santuko irteera heldu zaigu eta!

Aurtengo ikasturtea Altzon hasi genuen, oso irteera dibertigarriarekin! Bertan adar berriak martxan jarri genituen, bakoitzaren funtzionamendua azaldu eta errepasatu genuen, begirale bakoitza zein adarretan egongo zen esan, jolastu, gitarra jo, gaubelak egin, abestu, mozorrotu, ilea moztu, margotu, adarra jo... irteera bat, azken batean! Azken egunean gainera nolabait "informatizatu" egin ginen eta Interneteko orrietan zehar frogak egiten aritu ginen, Troiar birus baten trabak eta Panda baten laguntza gorabehera.

Gabonetan ere egin genuen irteeratxoa, betiko moduan. Allora joan ginen, Nafarroan, eta hango tenperatura frexkoa kontutan hartuta, oso ondo pasa genuen! Sukaldean aritu ginen, ingurua ezagutzeko txangoa egin genuen, Olentzeroren bixita eta guzti izan genuen! Beti gertatu ohi den moduan ez ginen nahi bezainbeste jende elkartu irteerarako, askok gabonetan bestelako planak egiten baitituzte, baina giro goxo eta ederrean pasa genituen egun haiek (Inuxente Komandoaren erasoak tarteko).

Eta guzti honen artean, larunbateroko dinamikak! Bilerak, jolasak, abentura, enpresa, Santo Tomas eguneko postua, tailerrak, asteburuko irteeratxoren bat, urteroko ihauterietako izotz-patinaje saioa, mozorroak... denetik! Oinarinak laburmetraia batean ari dira lanean buru-belarri, martxa honetan Donostiako Zinemaldian Urrezko Maskorra irabaziko dute! Hortxe dabiltza astebururo grabaketan, gidoia lantzen eta abar. Eta azkarrek aurten ere lanean dihardute euren proiektua aurrera atera ahal izateko, bidaiatxo bat Andaluzia aldera uda partean. Animo denoi eta segi lanean, oraindik badaukagu eta denbora aurretik guztia egin ahal izateko!

Hori bai, hemendik aurrerakoa ea era jarraiagoan kontatzen dugun blog honetan, bestela ustelduko zaigu eta...

Palazuelos de Cuestaurria

2010-10-06T09:29:00.012+02:00

Hartuko degu autobusa Burgos aldera joateko berriro ere, badirudi azken urteotan hango paisaiak gustoko dituztela begiraleek. Zelai horiak, berdeak, eguzkia, beroa, lehorra eta hautsa, eskerrak erreka gertu izaten dela, bertan pixa egin bitartean manley markak gorputzetik kentzeko. Aurtengoan behintzat pinudiak itzal ugari ematen digu, bestela goizetan kanpin-denda negutegi bihurtu eta izerdi patsetan jaikitzen baikara lurrean eserita gosaltzera. Hosto eta makiltxoekin apaindutako kola-kao beroa, kartoizko gaileta apurrekin. Dieta mediterraniarra.
Deskargatuko degu materialaren furgoneta giza-katea osatuta, hala txikienak pisua hartzeaz eskakeatu eta zaharrenek bizkarra hausteko, baulak, tablak, burniak eta butano bonbonak alde batetik bestera eramaten. Eta guztia sekulako gosearekin, inoiz ez gera heltzen eguerdia baina lehenago.
Txokoa bilatu, begiraleek ezezkoa esan, beste bat aukeratu, berriro ere ezezkoa jaso, eta azkenean beraien gomendioz, guk hasieran aukeratutakora itzuli. Kanpin-dendak jarriko ditugu, nun daude klabijak? Baten batek mailua ekar dezala! Beti bezela, denda zahar eta apurtuenak guretzako, beste adarren bati berrietako bat lapurtu beharko diegu. Total, ziur hautsi egingo dutela... Egiten duen beroarekin eta dena gutxi gorabehera prest edukita, ez daukat batere gogorik zanja egiten hasteko, euria hasten denean esango diot beste norbaiti presaka egiteko. Orain fregadero eta letrinak egiten hasi behar degula? Mesedez, lan haundiena guk egin degu eta! Begiraleak gu izorratzera besterik ez datoz.

Hari eta abalorioekin, kolore eta korapilozko aberrazioak egiteko tailerrak; batzuek sekulako detaile landuak eta beste batzuek 2 minutu eta 37 segundutan gogorik gabe egindako mokordoak jasoko dituzten “lagun ezkutuak”; manley, kartulina eta zabor poltsekin inprobisatutako mozorro paregabeak, material berarekin zenbat gauza desberdin egin daitezkeen erakusten omen digutenak (krisiaren eragina ote?); gitarra sesio amaigabeak, 3 aislantetan 8 pertsona etzanda eta 8 kg. pisatzen dituzten kantzioneroak aurrean ditugula; belarretan etzanda egindako siesta “naturalak”, 53 segunduro esnatzen inurri eta euliak uxatzeko.

Janari bila. Ea zer ematen diguten gaur intendenteek bazkaltzeko. Zerri hauek etengabe daude ahoa beteta mastikatzen, sukalde dezentea dute bazkaria prestatzeko, eta gu dieta behartuan gaituzte halako razio xurrak emanda. Gizendu behintzat ez degu gizenduko. Kaka zaharra, plater edo potorik ez det hartu janaria txokoraino eramateko. Buelta. Ea gure kanping-gas marabillosoa ondo dabilen, gosetuta gaude eta. Makarroi-masa gazi eta egosiegia tomate hotzarekin, txorizo apur bat eta Burgoseko zelaietako belar finak. Zorte pixkatekin, zomorroren bat ere sartuko da platerean, ea zaporea ematen dion. Gero edozer gauza ukituz gero, itsasita geratuko zait. Eta postrerako, esku zikinekin hartutako melokotoia almibarrean. Primeran. Ze alferkeria ematen didan orain fregaderoraino joan (gure txokoa toki diskretoan dago, bai, baina kriston paseoak eman behar ditugu edonora joateko! Pixkat gehiago eta Azerbaijan-en jartzen degu kanping-denda!) eta estropajo koipetsu zatar horiekin hau dena garbitzen hasteak. Fregaderoak dagoeneko duen usainarekin gainera. Kartetan partida bat antolatu behar det, tranpak egin eta beste batek fregatu dezan...

Ruta. Mila kilo pisatzen dituen motxila, eguzkitan erdi irekita doan txorizoak dena zikindu bitartean. Kantinplora erdi hutsik eta ura epela, lehen eguneko galtzerdiak fondoan dena kirasten, zakua gaizki lotuta alde batera eroriko dela. Bideko hautsa nere izerdiarekin nahastu da, izugarrizko moreno ederra sortuaz. Painoleta buruan eta oinetako babak alderik alde haritxo bat dutela. Amonaren erremedioak. Edozein herri txiki eta aspergarriko frontoian lo-zakua jartzen ari gerala monitoreren batek kanpaldiko hoberena ruta dela errepikatzen badit, gauean hortzetako pasta botako diot. Izorratu dadila.

Sukaldaritza eguna, eskatutako guztia ekartzen badigute sekulako otordua egingo degu, begirale pailazo hauek ez al dakite ezer egiten mozorrotu gabe? Ez dakit zein zentzu duen; parkout-a, haitiko lurrikara ez da ezer potingeak nere tripan eragiten duenarekin, flexioak, fregaderoko usain nazkagarria, 3 egunetak kendu ezingo dudana; zergaitik betiko abesti folklorikoak gaubelatan? Baden-Powellek ere Mikel Laboa abesten zuela esango nuke, eta norbaitek debekatu dezala koxkorrek gauero antzerkia egitearen ohitura, baina aldi berean neri ere ez diezadatela eskatu ezer egiteko; hartu papera, tapatu sudurra eta eutsi tripari, letrinara goaz eta, kilo t’erdiko moskardoien paradisura; beisbol partida masifikatu hauetan esango nuke soilik begiraleek pasatzen dutela ondo, batea hartzen dudanerako 2 ordu pasa dira eta.

Beti talderik okerrena jartzen didate talde egunean! Negartia, despistatua, patosoa, hiperaktiboa, astapotroa, sosa, erdi gaixorik dagoena eta ni. La tropa Goofy. Kartulina, pinotxo papera eta zabor poltsekin mozorrotu (primeran, eguzkitan ondo izerditzeko!), eta betiko plana: goizean froga jolasa, arratsaldean kirola (eta monitoreak tartean sartuko dira tranpa eginez irabazteko), gaubelan inolako zentzurik ez duen “antzerkia” begiraleen eskutik. Eta gainera aurpegi ona jarri behar, sangria nahi badegu. Eskerrak gauean hurrengo adarrera pasako naizela.

Eta amaitu zaigu aurtengo kanpa. Izerdia, zikinkeria, erdipurdiko janaria, betiko jolas eta tailerrak, ruta nekagarria, kanpin-dendako kiratsa, betiko txiste txarrak, gitarra desafinatuak, begiraleen bonbero ideiak, mozorro ezin kutreagoak, zomorroak, pikadurak, alergiak.
Baina hala ere ez dakit zer daukan, ez nukeela hau dena ezergatik aldatuko. Datorren urtekoaren irrikaz nago!

Irla Eguna

2010-07-12T08:27:00.004+02:00

Dagoeneko bete-betean gaude udan sartuta, eta larunbatetako bilerak amaitu zaizkigu! Urteroko moduan, honi amaiera emateko Irla Eguna ospatu genuen; adar guztiek batera Donostiako kaian txalupa hartu eta Santa Klara irlara abiatu ginen, eguraldi paregabea lagun genuela! Hemen dituzue egun hartako irudiak:

Ea aste honetan, kanpaldira goaz! Aurtengoan Palazuelos de Cuesta-Urrian izango gera!

Gabonetan izan zen...

2010-03-25T21:39:00.009+01:00

Aspaldiko kontu batekin gatoz oraingo honetan, artean 2009 urtea baitzen. Abendu amaiera genuen eta betiko moduan gabonetan elkarrekin egun batzuk igarotzekotan Elosura abiatu ginen, Bergaratik gora. Hara gindoazen lehen aldia zen. Eguraldia hotz zegoen, eta herrira iritsitakoan plaza bazterretan elur mordoxkak geratzen zirela egiaztatu ahal izan genuen. Autobusetik jaitsi, motxilak atera eta plazako frontoi estalian babestu ginen etxeko giltza zutenen zain. Hala ere, gutxi iraun zuen egoerak, segituan hasi baikinen elkarri elur bolaka, ordurarte lehor zegoen frontoia blai eginda utzi arte. Eskerrak motxila eta trasteak izkina batean babestu genituela… Gure bataila-grina apur bat baretutakoan, aurkezpen jolasei ekin genien, baziren eta gure artean berriak zirenak. Hala ere, segituan heldu ziren autoan erosketak, materiala eta etxeko giltza zekartenak, eta berehala abiatu ginen barrura, gela, txoko eta sekretu guztiak ezagutzeko gogo biziz.

Behin gelatan banatu eta traste guztiei txokoren bat bilatu ostean, denok elkarrekin mahaiaren inguruan eseri eta gustura bazkaldu genuen. Baina arratsean hasi zen dibertigarriena… Izan ere, adar bakoitzak arratseko bere ekintza hasi eta berehala, arazo txiki bat piztu zen etxeko instalazio elektrikoarekin. Baina denok etxetik irten eta apurtxo bat itxaron ondoren, gorriz jantzitako gizon xinpatiko batzuk etorri ziren laguntzera, argiz betetako kamioi handi batzuetan, eta instalazio elektrikoak ez zuen arazo handiagorik eman. Ez dakigu oso ondo zer gertatu zen, baina aldi berean ezer ez zela gertatu esan dezakegu. Hala ere, etxeko traste guztiak atera, B plana zehaztu, eta berriz ere autobusera igo ginen, gauaz Goizuetaruntz. Herrira heldu, motxilak jantzi eta linternekin ordu erditxo bat mendian gora joan ostean, gure etxea izango zenera sartu eta berriz ere gelak banatzeari ekin genion. Bidetik xirimiriak zertxobait busti gintuen, baina arropa lehorra jantzi eta mahaian eserita afari beroa jatea plazerra izan zen guztiontzat.

Hurrengo egunean zerua oskarbi zela esnatu ginen, eta eguna aprobetxatzeko gogo biziz jaiki ginen guztiok. Batzuk etxean bertan geratu ziren euren ekintza eta jolasak egiten, eta beste batzuek inguruak ezagutu eta mendi-txango labur bat egiteko aprobetxatu zuten. Arano aldera jo zuten koxkorrek, sekulako bista ederrekin gozatuaz.

Arratsaldean denok etxe inguruan geratu ginen, begirale batzuei eragin zien birus misteriotsu bat zela medio (!) zenbait adarrek elkarrekin egin behar izan baitzituzten programaturiko ekintzak. Eguna amaitzeko, afalostean ohiko gaubela ospatu genuen, gure artean berriak zirenek abestiak ikasten hasi zitezen.

Eta hurrengo eguna, Talde Eguna izan zen! Musikaren inguruan girotutakoa, musika estilo desberdinak ezagutu genituen goizean. Eta arratsaldean… talde bakoitzak bere bideoklipa grabatu zuen! Eskenatokiak prestatu, koreografiak sortu, janzkera zaindu… guztia kontu handiz prestatu ostean, kamerak, argiak eta akzioa! Goizuetako etxea grabaketa estudio inprobisatua bilakatu zen ordu batzuetan zehar, emaitza bikainekin (orokorrean).
Hala, gauean bideoklip lehiaketaren gala ospatu genuen. Musika eta bideo teknikariak aparailu guztiak behar bezala zebiltzala egiaztatu ostean, aurkezleek ongietorria eman zioten ekitaldiari eta epaimahaiak tokia hartu ondoren bideoklipen proiekzioa hasi zen.

Tartean lunch txiki bat egiteko astia ere eman zuen, zerbitzari panpoxen eskutik zerbitzatua. Amaitzeko, epaimahaiak bere epaia plazaratu zuen eta talde irabazlea zoriondu zuen, eta honen ostean omenaldi bideoklip bat proiektatu zen, talde beteranoenak egindakoa gainontzekoen gozamenerako.

Irteera ederra izan zen 2009ko azkena, ea 2010eko lehenarekin ere harekin bezainbeste gozatzen dugun (baina gorrizko gizon xinpatikoen presentziaren beharrik gabe!).

Berriro ere martxan!

2009-11-08T20:33:00.010+01:00

Duela hilabete gutxi gorabehera, ikasturtea hasi genuen Aratzen! Betiko moduan, Urriko zubia aprobetxatuta 4 egunetako irteera egin genuen, adar berrietan haur eta begiraleak kokatu eta martxa hartzeko. Aurtengoan Belabaratz aterpera joan ginen, Oreretan.

Ostiral arratsaldean motxilak eta zakuak hartu, trenera igo eta haruntz abiatu ginen. Haurren ezinegon handiena (urteroko moduan) begirale bakoitza zein adarretan jakitea zen, noski! Hala, iritsitakoan hau azaldu eta haur berriei ongietorria egin genien, aurtengoan dezente etorri baitzaizkigu.
Nahiz eta eguraldi kaxkar xamarra egin, hurrengo eguna nahiko probetxugarria izan zen adar guztientzat. Koxkorrak San Markoseko gotorlekura joan ziren oinez ingurua ezagutzekotan, eta zortea eduki zuten, ez baitzituen zaparradak harrapatu. Arratsaldean tailer bat egin zuten etxeko goxotasunean, atrapasueños eder batzuk. Gainerako adarrek ere aprobetxatu zuten kirola egiteko, mahai jokoetan aritzeko eta batez ere sukaldean lan egiteko, trebeek bizkotxo eder bat egin baitziguten, eta azkarrek... tortila leihaketa! Hiru taldetan banatu eta bakoitzak bere tortilak aurkeztu zituzten: chatka-rekin, gazta eta urdaiazpikoarekin, piper eta tipularekin, gaztarekin... ia denak oso goxoak zeuden gainera! (Baten bat ikatz zaporearekin atera zen, baina bueno).

Eta talde egunean, Mamu Harraparien koartel nagusia bilakatu zen Belabaratz! Haurrek eliteko talde honen parte izan nahi zutenez, Harrapari beteranoek hauek trebatzeko ardura hartu zuten: proba fisikoak, abilezia probak, punteria probak, estilo probak... denetik egin behar izan zuten, handik zebiltzan mamu pare baten umorea agoantatu beharraz gain. Eta gauean, munduko hainbat herrialdetan mamuak harrapatzeko dituzten teknikak ikasi zituzten gainera. Oso ikasketa betea izan zen, egia esan.

Amaitzeko, igandean etxea jaso eta garbitu, bazkaldu eta denok Oreretara jaitsi ginen oinez, han trena hartu eta gure etxeetara itzultzeko.

Hurrengo irteeran, gabonetan!

Leza de Río Leza

2009-10-08T16:21:00.019+02:00

Kaixo guztioi!
Ikasturtea hasteko puntuan gara eta badirudi uda osoan ezer ez dugula egin, hemen ez baitugu ezer idatzi, baina ez da hala! Urtero bezala, Uztailaren bigarren hamabostaldian kanpaldia egin genuen. Baina oporrak direla eta, memoria arazoak direla eta, orain arte ez dugu hemen ezer idatzi. Hor doa ba!

Urtero egiten dugun moduan, Uztailaren 15ean Anoetako Xanti taberna aurrean elkartu ginen Aratzeko kide guztiok, motxilak, zakuak, gitarrak, aislanteak eta traste guztiak gurekin genituela. Gurasoei agur esan, guztia maleteroan sartu eta denok autobusera sartu ginen, kanpaldira iristeko irrikitan. Bidean geldialdi txiki bat egin ondoren, eguerdi partean heldu ginen Leza de Río Leza herrira, aurtengo gure kanpalekua izango zena. Eta hemen aurreneko sorpresa, kanpaldira sartzeko erreka gurutzatu behar baitzen! Han pasa ginen denok motxila bizkarrean, oinetakoak eskuetan eta oinak frexko-frexko. Eta behin kanpaldi bertara iritsita, bigarren sorpresa; terrenoaren jabeak makina pasa zuen lurrari buelta emateko, eta belardi ederra beharrean harriz betetako lursaila genuen akanpatzeko! Hala ere, dendak jarri beharreko zonaldeak nolabait despejatu genituen, eta hirugarren gauerako denok kariñoa genion gerrialdean, saihetsetan edo bizkarrean gauero enkajatzen zitzaigun harri puskari...

Bazkaldu ondoren, adar bakoitzak bere txokoa aukeratu eta kanpaldia montatzen hasi ginen: pabeloiak, dendak, zaborrontziak, tendereteak, letrinak, fregaderoak... Lan honek hurrengo eguneko arratsaldera arte hartu zigun. Eta hemendik aurrera, jolasak, ekintzak, kirolak eta tailerrak!

Koxkorrek egunero gai baten inguruan egiten zituzten ekintzak; egun batean denak hippie-ak izan ziren, beste egun batean turistak, eta hala egunero. Mozorrotzeko irudimen eta abilezia paregabea erakutsi ziguten, egia esan!

Oinarinen adarrak Mundu Amaierako Konkistatzailea egin zuen kanpaldian zehar. Egunero nominatuak eta inmunitatea zituzten, "talde aberatsa" eta "talde txiroa" zeuden, Julian Jantzi eta guzti azaltzen zen goizero egunean egin beharrekoa aurkeztera! Euren artean pike batzuk sortu ziren arren, sekulako konpetitibitate sanoa mantendu zute oinarinek kanpaldi osoan zehar...

Azkarretan, azkarrek eurek programatu zituzten kanpaldian egin beharreko ekintzak, eta honen ondorioz kanpaldi lasaia eduki zuten; papiroflexia, globoflexia, igeltsoarekin maskarak... gehiegi mugitu beharreko ekintzarik ez, laburbilduz! Hala ere egun batean koxkorrentzan prestatu eta dinamizatu zuten ekintza bat, primeran atera zena.

Eta trebeak batez ere beste adarretako monitoreei laguntzen aritu ziren zenbait ekintzetan, beraien tailer batzuk egiteaz gain. Beraien txokoan tenis sare batekin montatu zituzten hamakak primerakoak ziren siesta botatzeko!

Aipatu beharra dago aurten berrikuntza bat eduki genuela kanpaldian, kriston arrakasta izan zuena; ping-pong mahaia! Ez zegoen libre egun osoan momentu bat ere, beti jendez inguratuta gainera. Txapelketa bat ere antolatu zen, nahiz eta finala ezin izan zen ospatu...

Rutari dagokionez, adar bakoitzak berea egin zuen, nahiz eta inguruko orografiaren eraginez denak nahiko antzerakoak izan ziren. Ingurua paregabea zen, eta Kameroseko bixta izugarrietaz gozatu ahal izan genuen denok gure rutetan. Gainera, zenbait herritan adar desberdinak elkartu egin ziren bazkaltzeko edota lo egiteko, hain ziren antzerakoak rutak.
Esan beharra dago gertaera bitxiren bat ere gertatu zela rutaren batetan, azkarrak egun batean zertxobait "desorientatu" baitziren baso batean barna, baina ez zer ezer apartekorik gertatu. Gainerakoen adarjotzea agoantatu behar izan zuten kanpaldi bukaera arte (arrazoiarekin), baina ezer gehiagorik ez.

Oinarinek, aldiz, errekatik egin zuten lehen eguneko etapa; ura gerriraino, motxilak ez bustitzeko asmakizunak egiten, harrizko paretak igotzen, arrokaz arroka saltoka... sekulako abentura izan zen! Lehertuta heldu ziren Soto en Cameros-era, baina oso esperientzia polita izan zen.

Honetaz gain, urteroko egun bereziak egin genituen aurten ere: Sukaldaritza eguna, non haurrek "jatetxe" modukoak montatu, menua erabaki, sukaldatu eta begiraleoi zerbitzatzen diguten (menu ederrak eduki ditugu aurten, egia esan!); Adarren eguna, non begiraleok nahastu eta gurea ez den beste adar batekin igarotzen dugun eguna, denon arteko erlazioa indartzeko; Raid eta Superbibentzia eguna, non haurrek euren kasa moldatzen ikasi behar duten kanpalditik at; Parkouta, aurkezpenik behar ez duen ekintza atsegin, garbi eta nutritiboa; eta azkenik, Talde Eguna.

Aurtengo kanpaldiko Talde Egunak Euskal Herriari bira zuen gai, baina festaz festa! Haur guztiak 4 taldetan banatu, eta bakoitzak hiriburu bateko festetako mozorroa egin behar izan zuen; Zeledon, San Ferminak, Tanborrada eta MariJaia. Ondoren, postu desberdinetan Euskal Herriko zenbait herri eta txokoetako festetan ohitura diren ekintzak egin behar izan zituzten, bertako harmarriak lortzeko; kukaña, "mahatsa" zapaltzea, Abordaia etab. Lekeitioko festetarako antzarrik lortu ez genuenez, untxi batekin inprobisatu behar izan genuen hau... Hala ere, kontuz ibili behar izan ziren, handik baitzebilen Goardia Zibila festetan parte hartzea ekiditeko!
Amaitzeko, gauean adar pasea egin genuen, adar bakoitzeko beteranoak hurrengora pasatu ziren.

Azken egunean dena jaso, bazkaldu, ebaluazioa egin eta nekatuta, izerditsu eta penarekin, etxera itzultzeko autobusera igo ginen, jada hurrengo urteko kanpaldirako gogoz...

Hala ere animo denoi, asteburu honetan berriro elkartuko baikara! Kurtsoa hasten da dagoeneko!

Amaitu da ikasturtea!

2009-06-30T13:55:00.008+02:00

Udan bete-betean sartuta gaude dagoeneko, eta guk ere amaiera eman diogu kurtsoari! Jada amaitu ditugu larunbatetako bilerak, abenturak eta jolasak. Guzti honi agur esateko, duela aste pare bat merendola egin genuen Ategon adar guztiek elkarrekin, urteroko moduan. Han elkartu ginen haur, gazte eta monitoreak, eta eguraldi ona egiten zuela aprobetxatuta, kalean jolasean aritu ginen aurrena. Semaforoa, pañuelitoa, muxu-plakaje... gosea sortzeko primerako jolasak! Eta ondoren, haur eta gazteei gehien gustatzen zaiena: Ategoko atea ireki, eta mahai gainean sekulako janari, edari eta litxarkeria pila! Bat baino gehiagok ezingo zuen afaldu ere egin gau hartan...

Eta urtean zeharreko guztiari amaieratxoa eman eta kanpaldirako motoreak berotzen hasteko, lehengo ostiralean Irla Eguna ospatu genuen! Aratz eta Iruzun taldeetakoak goizean Donostiako kaian elkartu, txalupa hartu eta Santa Klarara abiatu ginen, egunpasa. Hasieran eguraldiak ez zuen itxura onik, baina azkenean sekulako eguna geratu zitzaigun! Egun osoa krema ematen pasa behar izan genuen, halakoa zen eguzkia...
Aurkezpen jolas batzuk egin ondoren, irlako beheko partera joan eta han ibili ginen igerian, jolasean, eguzkitan etzanda, karramarro bila... Eguerdi partean berriro goiko aldera joan, bazkaldu, eta arratsean berriro behera! Gabarroira joan igerian, siestatxoa bota, marearen igoerarekin jolastu... bazirudien urtetan ez genuela hondartza bat zapaldu, horren ondo pasa genuen!
Arratsean berriro txalupa hartu, kaira itzuli eta izozki eder bat jan genuen bakoitzak, eguna amaitzeko.

Orain hasi denak prestatzen, hurrengoa kanpaldia izango baita! Kontuz Leza de Río Leza, segituan han gara eta!

Azkarren egunpasa!

2009-06-16T19:59:00.005+02:00

Pasa den igandean, azkarrek ibilalditxo polit bat egin zuten. Kurtsoari amaiera emateko elkarrekin plan politen bat egiteko gogoarekin zebiltzan, eta egunpasa bat egitea erabaki zute. Hasierako plana Pasaiako elkarte batean bazkaldu eta Jaizkibel zertxobait ezagutzea bazen ere, azken momentuan plan alternatiboa egin zuten, egoerak hala behartuta. Beraz, bakoitzak bere motxila eta bokadiloa hartu eta goizean Ategon elkartu ziren, egun polita pasatzeko asmotan.
Ategorrieta atzetik Sagues aldera jo eta Uliako aterpetxe ingurura igo ziren oinez. Handik, Herri Ametsa ikastolaruntz abiatu ziren. Bertan gainera kurtso amaierako festa ari ziren ospatzen, eta Aratzeko beste zenbait kide topatu zituzten bertan, momentu hartan dantzan ari ziren haurrak ikusten ari zirela. Ondoren, itsasaldeko bidea hartu eta La Platako itsasargiraino joan ziren, paisaia paregabea begien aurrean zutela.
Itsasargi inguruan dauden mahai batzuetan geldialditxoa egin zuten bazkaltzeko, etxetik eramandako bokadiloak. Baten batek eskertu zuen, bide guztia kexaka eman baitzuen, koxkorrak baino alferrago...
Bazkalostean Pasai San Pedrora jeitsi ziren, eta bertatik Ategorrietara itzuli ziren, Trintxerpe eta Bidebieta atzean utzita. Ategoko sofatan bota ondoren, proiektorea martxan jarri eta zine sesio ederra egin zuten eguna lasai-lasai amaitzeko. Adar osoa agertu ez zen arren, plan polita egin zuten ikasturtea amaitzeko!

Gaintza

2009-05-15T19:25:00.010+02:00

Dagoeneko igaro dira aste batzuk, baina Aste Santuan eskapadatxoa egin genuen Gaintzara! Ohiko moduan, Aratz osoa elkartu ginen hara joateko. Donostian trena hartu ondoren, Ordiziatik oinez abiatu ginen aldapan gora Gaintzaruntz.
Bidea ez zen gogorra, baina bai luzea ordea, eta batek baino gehiagok eskertu zuten motxila igotzeko sherpa zerbitzu inprobisatua. Hala ere, eguerdirako denok herrian ginen, aterpea ezagutu eta bakoitzaren litera aukeratzeko prest!

Lehen eta azken egunetan euri pittin bat bota zigun arren, eguraldi nahiko ederra eduki genuen irteeran zehar. Gainera, hango parajea eta bistak ikusgarriak dira! Goizean goiz esnatu eta Txindoki behelaino pixka batekin ikustea eguzkia ateratzen ari den bitartean, kriston ikuskizuna da!
Irteeran zehar adar bakoitzak bere ekintzak eraman zituen aurrera; ingurua ezagutzeko irteeratxoa, sukaldaritza tailerra (egindako hojaldreak goxo-goxoak zeuden, nahiz eta baten batek hortzak garbitzeko balio zezakeen), aterpe ondoko frontoia aprobetxatuta kirol pixkatxo bat, proba-jolasak... Gainera, etxeak badu Txindoki aldera ematen duen galeria bat sofa eder batzuekin, eta han hizketan eta gitarra joaz ere ordu batzuk eman genituen.

Bitxiena, nola ez, Talde Egunean gertatu zen. Esnatu eta bapatean Erdi Aroan ginera konturatu ginen! Hala, gure garaira itzultzeko herritik zehar zebiltzan pertsonaiekin harremanetan jarri behar izan genuen; errementaria, bufoia, erromesa, garbitzailea, nekazaria, zalduna... Hala ere, kontu handia eduki behar zen, Inkisizioa ere handikan baitzebilen, guztioi zelatan!
Hala ere, frontoian ospatu zen feria batean parte hartu eta dibertitzeko aukera ez zigun kendu honek. Han gure abilezia erakutsi behar izan genuen; punteria, lasterketarako gaitasuna, erreflexuak... denetik pixka bat.
Amaitzeko, gauean akelarre eder bat ospatu, eta bertan egindako sorginkeriei esker, gure arora itzuli ahal izan genuen.

Hurrengo irteera, kanpaldia! Bertan ikusiko gera!

Ihauteriak!!

2009-02-23T12:19:00.002+01:00

Ihauterietan bete-betean gaude sartuta, eta Aratzen ere ospatu ditugu!
Gainera ohitura zaharrak berreskuratu ditugu, eta garai batean egiten genuen moduan, aurten Txuri-Urdin Izotz Jauregira joan gera adar guztiak elkarrekin, izotz gainean patinatzera!
Monitoreok Asterix eta Obelixen komikietako pertsonaietaz jantzita azaldu gara; han ziren patinatzen Asterix eta Obelix, Abraracurcix, Panoramix, Asuranceturix, Esautomatix, Ordenalfabetix eta Falbala! Honetaz gain, munstroak, zenbait mimo, emakume titi-handiak, super-heroiren bat, mantangorriak, Kiss taldeko abeslaria, turistaren bat, hinduren bat... denetik elkartu ginen patinatzeko! Erorketa ugari (ezer graberik ez, hala ere), abilezia handiko patinatzaileak, izkinetik aldentzen ez ziren hasiberriak... eta kriston giro polita!
Datorren urtean gehiago eta hobeto! Gora Ihauteriak!

Urte berri on!

2009-01-31T11:07:00.008+01:00

Dagoeneko hilabete osoa pasa da gabonetako irteera egin genuenetik!
Aurtengo abenduan Askizura joan ginen, Zumaia eta Getaria arteko auzoa, lau egun paregabe igarotzekotan. Lehen egunean paseotxo eder bat egin genuen euripean blai aterpera heldu arte, baina kriston goxotasuna nabaritu genuen bertara sartu, arropa lehorra jantzi eta gelatan instalatu ginenean. Gainera, hurrengo egunetan eguzki ederra izan genuen lagun, primeran hortaz.
Ingurua izugarri polita zen, zelai, mahasti eta txakolindegiz inguratua, eta itsaso zabala ikusten zela. Koxkorrek ingurua ezagutu eta goiza pasatzeko txango polit bat ere egin zuten, eguraldia aprobetxatuta. Gainerako adarrek jolasak, tailerrak, kirola, sukaldean postreren bat... denetik egin zuten. Bazkalostean siesta ederrak ere bota genituen, denok elkarrekin saloian gitarra hotsa entzunaz. Aterpe ondoan, gainera, frontoi bat genuen futbolean, eskupilotan, palan edo beste edozer gauzetan aritzeko, ondo aprobetxatu genuen.

Baina onena Talde Eguna izan zen, nola ez. Izan ere, Askizuko Festak antolatu genituen!
Goizean, gosaldu ondoren, koadrila bakoitzak bere blusa egin zuen festetan parte hartzeko. Pregoia irakurri eta txupinazoa bota ostean, koadrila jeitsiera egin zen herritik zehar, txikitixaren soinupean eta bidetik jolas ugari eginaz; arraultza jaurtiketa, irrintzi leihaketa, ur-jolasak, makil-erreleboak etab. Txikitixa eta panderoarekin kalejira ederrak egin eta herri osoa girotu genuen!
Eguerdian herri-bazkaria egin genuen kalean, paella ederra janaz. Eta arratsean, herri-kirol leihaketa eduki genuen koadrilaka, noiz behinka azaltzen ziren buruhandiek lagunduta; sokatira, lokots bilketa, pilota partidak... Sokamuturra ere antolatu genuen herriko plazan!
Festak amaitzeko, afalostean berbena izan genuen aterpe barruan, denok abesten eta dantzan jarri gintuen talde batek girotuta.
Askizun ez zen sekula halako girorik egon, ezta benetako festetan ere!

Betiko moduan, irteera paregabea izan zen abendukoa. Hurrengoa, Aste Santuan!

Martxan gara

2008-12-13T09:29:00.007+01:00

Bloga aspaldian abandonatu xamar egon den arren, honek ez du esan nahi Aratz martxan ez dagoenik! Aspaldian hasi genuen kurtsoa, Urria hasieran. Honetarako egun batzuetako irteeratxoa egin genuen Urnietara, azken urteotan ia ohitura bilakatu dena. Normalean baina egun gutxiago igaro genituen han, aurten Urrian ez baita zubirik egon eta ikastolak ezin izan genituen konbentzitu aratzkide guztioi jaiegunen bat emateko. Pena. Hala, 4 egunetakoa beharrean 3 egunetakoa izan zen kurtso hasierako irteera, baina izugarri ondo aprobetxatu genituen egun hauek! Eguraldia gainera primerakoa izan zen, gozada bat.

Haur eta gazte berriei ongietorria eman eta taldea aurkeztu ondoren, adar bakoitzak irteera hau pittin bat kokatzeko erabili zuen, haur ugari pasa baitziren beste adar batetara, adina zela eta. Hala, adar bakoitzaren funtzionamendua azaltzeko jolasak egin ziren nagusiki. Mahai jokoak, froga jolasak, kirolak... denetik eduki genuen. Gaubelak ere ederrak izan ziren, dantza, kantu, antzerki eta abarrekin. Ondoko baserriko animaliek ere bixita ugari eduki zituzten, koxkorren aldetik batez ere.

Kurtsoa aspaldian jarri genuen martxan, beraz. Gainera dagoeneko hiruilekoa amaitzen ari zaigu, eta segituan egingo dugu hurrengo irteera, gabonetakoa (oraingoan 4 egunekoa, behar den moduan!). Bloga ez mugitzeak ez zuen esan nahi Aratz mugitzen ez denik, hortaz! Martxan gara!

Matallana de Torío

2008-08-31T20:28:00.023+02:00

Kaixo ama, kaixo aita, kaixo anaia edo arreba, kaixo laguna:

Itzuli naiz aurtengo kanpalditik! Leher eginda nago, eta ziur aski Abuztu osoan zehar azalduko dira kanpaldiko arrastoak dutxan, baina izugarri ondo pasa det Matallana de Toríon! Pentsatzen det zuri luzeak egingo zitzaizkizula 20 egun, baina neri motz-motza egin zait! Gero eta arropa garbi gutxiago nuelako bakarrik konturatzen nintzen kanpa aurrera zihoala...

Eguraldia, orokorrean oso ona. Ekaitzen batek harrapatu nau, baina ez da ezer serioa izan. Ez dezu ikusten ze moreno nagoen? Egun guztia eguzkitan, bainujantzia besterik ez det erabili! Hori bai, gauetan hotza, e! Ondokoari ondo pegatuta egin det lo, bestela ezin zen eta!

Kanpa kriston polita zen. Beti bezela, erreka bertan zegoen. Gainera aurten justo kanpan urjauzi txiki bat zegoen, eta handik saltoka ibili naiz, bainatzeko. Monitoreek ez zidaten buruz botatzen uzten (kriston sosoak dira), baino bueno. Fijatzen ez zirenean botatzen nintzen. Baino onena izan da, aurten kanpa ondoan herriko igerilekua zegoela! Egun batzutan hara joaten ginen, dutxatzeko batez ere. Komuna eta guzti, kriston lujoa! Ez dakizu zer den letrinan kaka egin beharra... Batez ere 10. egunetik aurrera edo horrela, ze jendeak ez du oso ondo apuntatzen, eta papera ere ez du barrura botatzen askotan... ajjj!!

Lehenengo gaubela igerileku ondoko pabelloian izan zen. Bueno, gaubela edo horrelako zerbait. Herriko tipo bat etorri zen kanpara, eta monitoreei esan zien gauean han kontzertu bat egongo zela, gonbidatuta geundela. Eta afaldu ondoren denok joan ginen “kontzertua” ikustera. Publiko moduan ez zegoen ia inor (guztira 8 pertsona edo), eta musika jotzen zutenak (Banana Folk edo horrelako zerbait zuten izena) Leon osoko kolgatuenak ziren! Hiru tipo, danbolin moduko bat, eskusoinua eta gaita jotzen, kriston musika arraroa egiten. Gainera, bapatean hasi ziren esaten ea noizbait pentsatu genuen platanoak ze gizajoak ziren, ezin zutelako elkarren artean liatu, puntak txokatzen zirelako (toma ya!). Gero, bi abestiren artean platano batzuk ere banatu zizkiguten (eskertu genizkien, ze afaldu genuenarekin...). Nahiko panorama surrealista, ikusten dezun moduan. Gauza pixkat alaitzeko kalejira batzuk inprobisatu genituen, ze erremedio... A, justo koxkor baten urtemuga zen, eta “zorionak zuri” jo ziguten Banana Folk-ekoek. Detaile polita, egia esan. Total, bukatzeko “Platanoen Eskubideen Pasodoblea” jo ziguten hippie folkloriko haiek, eta kanpara bueltatu ginen lo egitera. Surrealista zeharo.

Beste gaubelak normalak izan dira; batzutan gitarrekin abesti eta dantzak, gauren batean jolasen bat ere egin degu (tipikoak, tren txu-txu eta horrelakoak), eta gau baten telebista saio moduko bat egin genuen, abesti eta musika lehiaketa antzerako bat (kriston aurkezle-trabesti ederra eduki genuen). Txaskarrilloak, abestiak, antzerkiak... betiko moduan.

Eta gero, lotara joaterakoan ere, beti zegoen zerbait; pasta botatzera zetorrela norbait, zakuan zapo bat topatzen zenuela, dendako makilak kendu eta gainera botatzen zizutela... Beti alerta egon behar!

Egunak beti bezela, gozada bat. Lehenengo egunetan, nola San Ferminak ziren oraindik, entzierroa egiten genuen gosaldu aurretik; monitoreen denda aurrean “A San Fermin pedimos” abesten genuen, eta hauek esnatu berri eta oraindik zer gertatzen zen oraindik oso ondo ez zekitela zezenak balira bezela ateratzen ziren dendatik, gure atzetik. Baino oso zombi egoten ziren oraindik, eta ez gintuzten ia harrapatzen. San Ferminetako azken egunean “Pobre de mí” eta guzti abestu genuen.

Gero, 10ak aldera (normalean pixkat beranduxeago), gosaria. Gero fregatu, eta monitoreei okurritzen zitzaienean, goizeko ekintza. Bueno, koxkorrak lehenengo “egunondora” joaten ziren; zuhaitz batetik eguneko programaketa jaisten zuten. Hippie eguna, eskaut eguna eta horrelakoak egin dituzte. Hoberena, España eguna izan da: kanparen erdian Espainiako kriston bandera eduki genuen jarrita, sebillanak, kordobesak eta zezen plaza inprobisatu batean korrida eta guzti eduki genuen. Kanpa guztia globo hori-gorriz beteta egon zen!

Parkouta ere egin degu aurten, nola ez. Lokatzetan abdominalak, potinjea, fregaderoan sartu, lurretik arrastaka ibili, errekan sartu, korrika joan alde batetik bestera... en fin, kriston zerrikeria, baina guay dago.

A, “apustu eguna” egin degu aurten! Monitoreek objektu lista bat eman, eta taldeka herrian lortu behar genituen. Goardia Zibilaren kuarteleko bandera eta guzti eraman genien monitoreei! Flipatu egin zuten! Jajaja. Bisbalen posterrak, udaletxeko Leoneko bandera, txaleko reflektanteak, arrautza bat kaiola batean, bizikleta kamarak... denetik lortu genuen! Herriko jendea izugarri jatorra, pilo bat lagundu ziguten egun hartan.

Betiko egun bereziak ere egin ditugu; Sukaldaritza eguna (kriston menuak prestatu genizkien monitoreei, ez dira kejatuko!!), Adarren eguna, Basati eguna, Superbibentzia eta Raid-a (superbibentzian izugarri ondo tratatu gintuzten inguruko herrietan, kriston pila jan genuen eta lana egin beharrik gabe!)... Urteroko gauzak.

Bestela, egun normalak ere gozada bat. Pista-jolasen bat, tailerrak, masaje sesioak, body painting, bainuak errekan eta igerilekuan, bandera jolasak, beisbol eta futbol partidu erraldoiak (aratz guztia batera), gitarrarekin abestu, siestak (trebeek tenis sare batzuekin kriston hamakak egin zituzten!), arropa tintatu, ilea tintatu eta moztu... denetik, beti bezela!

Ruta kristona izan degu, oso zona polita zen. Picos de Europa ondoan geunden, eta kriston mendi ederrak zeuden inguruan. Desfiladero estuetatik pasa gera, haran zabaletatik ibili gera, mendi porturen bat ere igo degu... A, eta Valporquero-ko kobazuloak bixitatu genituen. Kriston kobazulo handiak dira,azalpenak ematen zituen tipoak esan zuen espainia mailan, bixitariei irekita dauden handienak direla. Ikusgarriak dira egian esan, denok flipatzen egon ginen bixitak irauten zuen denboran. Beste egun batean artzai bat ere ezagutu genuen, kriston ardi pila zituena, eta istorio polit batzuk kontatu zizkigun bidetik. Oso pertsonaia bitxia.

Lo egiteko betiko moduan; eliz atariak, frontoiren bat, etxeren bat ere utzi ziguten herriren batean, polikiroldegiren bat... oso ondo tratatu gaituzte herri guztietan.

Eta kanpa amaitzeko, beti bezela, azken egunean Talde Eguna! Aurten Aratzen 30. urteurrenaren ingurukoa izan da. Eta nola ez, Italia-Abisinia ere egin degu! Badakizu, denak txuriz jantzita guapo-guapo jolasean hasi, lokatzetan borrokan aritu eta amaieran denok goitik behera zerri eginda amaitu! Izugarria da!!

Gaubelan antzerki bereziak egin genituen, takotea jan eta adar paseak egin ziren. Beraz tokatzen zaienak datorren urtean beste adar batetan egongo dira.

Azkeneko egunean dena jaso genuen, autobusa hartu eta denok erdi lo, melankoliko eta triste, etxerako buelta egin genuen. Hurrengo kanpara joateko gogoarekin nago dagoeneko!!

30 urte,

30 urte ditu Aratzek.

Beste horrenbeste,

beste horrenbeste,

beste horrenbeste iraun baietz!!

Piratak Santa Klaran!

2008-07-05T22:02:00.001+02:00

Lehengo astean, Santa Klara uhartea piratek hartu zuten!
Asteazken goizean marinel ugari ikusi zituzten donostiarrek hiriko portuan. Euren artean zenbait itxuragaizto zeuden, aurpegian orbainak eta besoetan tatuajeak zituztenak. Hauek gainontzeko marinel gazteak gidatzen zituztela zirudien, egin beharrekoa esaten baitzuten.
Lau taldetan, marinel hauek Urgull mendira igo ziren lehenbizi, eta han Santa Klara uharteko mapa topatu zuten, zenbait puntu gorriz markatuta zituena. Itxuraz pirata izateko probak gainditu behar zituzten, eta honetarako portuan txalupa hartu, eta irlara abiatu ziren.

Irlara heldutakoan, talde bakoitzak bere aldetik uharteko piratak bilatu zituen maparen laguntzarekin. Pirata hauekin zenbait proba bete behar izan zituzten beren balioa eta ausardia erakusteko: pirata bandera bat diseinatu behar izan zuten, uretan zeuden botila batzuk erreskatatu behar izan zituzte, hieroglifiko zailak interpretatu, mezu ezkutuak deszifratu, pirata dantzak egin... eta hala, azkenean altxorraren kokalekua erakusten zuen pergamino zaharra irakurri ahal izan zuten.
Bertan jartzen zituen argibideak jarraituta, puntu konkretu batera heldu, lurra zulatzen hasi, eta Santa Klarako piraten altxorra topatu zuten! Munduko pirata maltzurrenen arteko kide bilakatu ziren hala marinel gazte haiek!

Ospatzeko, denek elkarrekin bazkari ederra egin zuten eguzkitan, eta arratsaldean uretan jolasean aritu ziren, hurrengo abordaia eta lapurretak planifikatu bitartean...

Merendola Ategon!

2008-06-17T11:32:00.007+02:00

Eguraldiak kontrakoa erakusten digun arren, uda hemen omen dugu jada. Klaseak amaitzen edo amaituta, batzuek selektibitatea ere egin dute, baten bat errekuperaketak egiten arituko da (animo!)... eta Aratzen ere amaitzen ari zaigu kurtsoa. Bukatu ditugu larunbatetako bilerak, eta hauei amaiera borobila emateko, urtero egiten dugun moduan, Ategon merendola eder bat egin genuen larunbatean, adar guztiek elkarrekin.

Bitxikeria handiena eguraldia izan zen, eguzkia eduki baikenuen! Hau da hau! Aprobetxatzeko, kalean aritu ginen jolasean. Ategorrietako frontoia okupatua zegoen, pala partiduak baitzeuden, eta alboko parke batera joan ginen jolasera.
Hasteko, aurkezpen jolasen bat egin genuen, aurten haur berri asko sartu baitira taldera, eta adar desberdinetakoek ez zuten elkar ezagutzen. A, eta monitora berri bat ere azaldu zen, Ane! Ongi etorri!
Ondoren, hainbat jolas egin genituen: muxu-stop jolasean aritu ginen, bikoteka dantzan kopetarekin intxaur bat eutsita, oinetan lotutako globoak lehertzeko txapelketa antolatu genuen, sokatiran ere aritu ginen ederki izerditu arte... eta ondoren, indarra berreskuratzeko, Ategora itzuli ginen meriendatzera.
Bertan etxe barruan eta kanpoan egon ginen hizketan, jaten, jolasean, kotilleoan... eta ikasturtean egindakoa gogoratzen ere bai, nostalgiko xamar.

Hala ere ez tristetu, oraindik hoberena geratzen zaigu eta! Datorren astean Irla Eguna, eta uztailan kanpaldia! Hasi pentsatzen beraz motxilatan zer sartu, aurten gainera 20 egunetarako joango gara eta! Datorren astera arte, Aratz!

Orendainen asteburupasa

2008-05-29T16:04:00.011+02:00

Hirugarren hiruhileko hau borobila izaten ari da Koxkorrentzat. Larunbatero egindako ekintzetan tailerrak eta batez ere, jolasak barra barra izan ditugu ohi den moduan. Gainera, aparteko istorio baten protagonistak izan gara, ezustekotik ezustekora eraman gaituena. Istorio horrek orain dela asteburu pare bat izan du bere amaiera.

Apirilaren 5ean, larunbatero bezala, boulevardean bildu ginen gure ekintza egiteko. Egun horretako jolasak bukatu eta gero, gure lokalera opari berezi bat iritsi zela jakin genuen: koadro misteriotsu bat. Honekin batera, eskutitz labur bat zetorren orain dela urte asko Aratzeko Koxkorra izandako pertsona baten izenean. Kartak zioenaren arabera, pertsona horrek lehiaketa bat irabazi zuen duela urte dezente koadro horri esker. Horregatik, berarentzat esanahi berezia zuen koadro hori Aratzeko Koxkorrek izatea nahi omen zuen.
Koadroaren izkinean “Kiku” jartzen zuen. Baina, nor zen Kiku? Zergatik nahi zigun guri opari bat egin?

Hurrengo larunbatetan, udaletxeko bulegoetan aspaldiko lehiaketa horren irabazleei buruz galdetuaz , azken 30 urteotan Aratzetik pasa den jendearen izenak miatuaz eta pistatik pistara abiatuz, misterioa argitu genuen. Koadro misteriotsu hura “Kiku” bezala sinatzen zuen pertsonak Arritxu zuen izena.
Arritxuk, gure interesaren berri eduki zuenean, eskutitz bat bidali zigun eta bertan Orendainen Maiatzaren 17an azaltzeko agintzen zigun. Elkarrekin asteburu bateko irteera bat egiteko aitzaki ezinhobea zen hura! Halaxe egin geunen.

Maiatzaren 17an, trena hartu eta Orendainera joan ginen. Iritsi, bazkaldu eta frontoian jolas pila bat egin eta gero, han azaldu zitzaigun Arritxu. Aratz Taldeak sarritan egin ditu irteerak Orendainera, eta bertako etxean sartzean, burura oroitzapen polit ugari etorri zitzaizkion.
Denen artean oroigarri moduan gordeko dugun mural bat gure eskuen markekin betetzen genuen bitartean, Arritxuk painoleta horia (eta urdina, eta berdea…) eraman zueneko garai horiek nolakoak izan ziren kontatu zigun. Hala jakin genuen bidalitako koadro hura, bere oinarin garaiean egin zuela, Orendainera egindako irteera batean, hain zuzen ere.
Oso une atsegina izan zen guztiontzat. Mural horretan, Oinarinei, Azkar eta Trebeentzako hutsunea utzi genuen. Hauei euren eskuen markak utzi araziko genielaren promesa eginez agurtu genuen Arritxu beste bat arte.

Asteburua, motza egin zitzaigun: Frontoian barrenera, briletera, txapara, bonbara… jolasten aritu ginen; Orendaineko etxean dagoen futbolin zaharrean hamasei mila partida jolastu genituen; igandean, herri guztian zehar pista-jolas erraldoi bat egin genuen. Sabela ederki bete genuen baita ere, “postre goxoa” aspertu arte jan genuen (afarian, gosarian, trenean jada Donostirako bidean geundenean…) eta igandeko bazkarian, Aratzeko platerrik hoberena: haragi pastela.
Leher eginda iritsi ginen Donostiara. Datorren larunbatetan gehiago edukiko dugu, eta, bistan ditugu jada Irla eguna eta kanpaldia.

Arritxurekin batera, bere bi urteko alaba txikia etorri zen. Nork daki? Beharbada, egunen batean, asteburu honetan muralean markak utzi dituen koxkorren bat bere monitorea izango da.

Bazen behin Ernioko borda batean...

2008-05-28T18:22:00.009+02:00

Gure oinarinekin aurreko asteburua Ernio mendian pasa genuen, bertako borda batetara joateko plana egin baitzuten. Hiruhileko honetako lehenengo abentura amaitu genuen horrela. Larunbat arratsetan menua pentsatzen (gosariko kruasanak detaile polita izan ziren, tropa!), ekintzak programatzen, garraioa antolatzen... aritu ostean, dena gutxi gorabehera lotuta zegoenean (gutxi gorabehera), goiz jaiki eta Erniora abiatu ginen.

Larunbat goizean trena hartu genuen Tolosara joateko, han autobusa Bidania-Bidegoian alboraino, eta bertatik oinez abiatu giren mendian gora bordara heldu arte. Batzuk alferragoak izan ziren eta partido edo txapelketen aitzakiarekin, eguerdi partean kotxez igo ziren haraino.
Hala, goiza borda txukundu eta garbitzen, bidoiekin iturritik ura garraiatzen (bordako ur depositoa bukatzekotan zegoen) eta jolasean eman genuen, kartetan, futbolean edo beste edozer gauzatan. Eguerdian falta zirenak iritsitakoan etxetik eramandako bazkaria banatu genuen denen artean, tripa-zorriek ordurako kriston serenata baitzuten! Ondoren digestioari ere tartea eman genion, lasaitasun ratutxo batekin.
Arratsalderako froga-jolas bat zuten antolatuta oinarinek; galderak, tabua, froga fisikoak, mimika... denetik egin genuen. Lasaia eta dibertigarria izan zen jolasa, egia esan. Eta ondoren, bi taldetan banatuta gauerako ekintza antolatzen aritu ziren haurrak, Beldurrezko Gaua egiteko joan baikinen Erniora!
Lumigasen argipean saltxitxak patata purearekin afaldu ondoren (argirik ere ez zegoen bordan, noski), gaubelari ekin genion; aurrena, han inguruan hildako pertsona batzuen arimekin gora eta behera aritu ginen, bakoitza bere hilobira eramateko. Eta ondoren, Ernion egon zen lapurreta bat argitu behar izan genuen, urte mordo bat lehenago ostutako zilarrezko erloju bat nork zuen jakiteko.
Oihuak, lasterketak, erorketaren bat (erorketa ikusgarriren bat), urduritasuna, barreak... denetik egon zen ilargipean eta behelaino artean. Gau polita izan zen!

Hurrengo goizean jantzi, bezperakoa garbitu eta nagiak kendu ostean, gailetak eta kruasanak eduki genituen gosaltzeko, Aratzen aspaldian egin ez zen gosari ederra! Gainera ordurako nahiko gosetuta geunden guztiok (gauza batzuen eta besteen artean, eguerdiko 12ak aldera gosaldu genuen!), eta primeran sartu zen gosaria.
Ondoren motxilak egiten, gauzak bere tokian jartzen, garbitzen etab. hasi ginen, beste batzuk bazkariaz arduratzen ziren bitartean.
Arratsaldean, dena garbitu eta txukun utzi ondoren etxerako bidea hartu genuen denok, asteburu ederra igaro izanaren sentsazioarekin, baina aldiberean etxera heldu eta dutxa bero bat hartzeko irrikitan (buelta espero baina pittin bat luzeagoa egin zitzaigun, Tolosan trena 5 minutugatik galdu baikenuen, baina hori beste istorio bat da...).

[Eskerrik asko Unsaintarrei bordara joateko aukera eskaintzeagatik!]

30. urteurrena

2008-04-14T16:27:00.013+02:00

Aurten gure taldeak 30 urte bete ditu. 30 urte, haur eta gazteak balore eder batzuen inguruan eta euskara hutsean heziz. 30 urte, larunbat arratsero elkartuz. 30 urte, penintsulako geografia zabalean zehar akanpatuz. Hau ospatzeko, gaur egun Aratz aurrera daramagun monitoreok asteburupasa eder bat antolatu diegu garai batean gure monitore izandakoei, eta bi egunez berriro ere haur bilakatu dira gure taldean.

Haurrekin ohi dugun moduan, Donostian elkartu ginen denok autobusa hartu eta Astigarragara abiatzeko. Bertan, motxilak bizkarrean hartu eta Santiagomendira igo ginen eguzkipean. Heldutakoan aurkezpen jolasak egin genituen, ez baikenuen denok elkar ezagutzen (orain dela urte asko aritutako monitoreak etorri ziren, eta gutako batzuek ez zituzten ezagutzen). Gutxi gorabehera izen guztiak ikasi genituen, eta giroa pizteko, klasikoetara jo genuen: semaforoa, bulldog... barre ederrak egin genituen denok elkarrekin! Eta zelako agujetak eduki zituzten batzuek hurrengo egunean!

Bazkaltzeko, etxetik eramandakoa denon artean banatu genuen, buffet moduan jarrita. Betikoa: bokadilo goxo-goxoa ekarri zutenak izorratu behar, eta bazkari zozo eta triste xamarra zutenak, poz-pozik. Baina inor ez zen kexatu, hori edukazio ona dutena "Vieja Gloria" hauek...

Arratsean proba-jolas handi batean hartu zuten parte gure "haur" handi haiek, puzzle erraldoi baten piezak lortu ahal izateko. Nork pentsa zezakeen, horrenbeste urteren ondoren berriro ere Potingea (Aratzeko sukalde eta intendentzietan esklusiboki prestatzen den delicatessen berezia) dastatuko zutela? Harri bati bueltak ematearen proba egin beharko zutela? Muturra irin plater batean sartu beharko zutela, txanpon bat bilatzeko? Honelakoak eta beste asko eginez haurtzarora itzuli ziren gure "vieja gloria"-k, nahiz eta beren artikulazioek kontrakoa esan...

Amaieran, lortutako pieza guztiekin puzzlea osatu zuten, eta han etorri zen eguneko sorpresa: Aratzeko argazki zahar eta berriekin Atego osatzen zen mosaiko erraldoia azaldu zen beraien begi aurrean! Mural ikusgarria!

Asteburuko tarte libreetan argazki zaharrak ikusten aritu ginen gainera, eta bideo emanaldi batzuk ere eduki genituen, kanpaldi eta irteera zaharretakoak. Garai bateko monitore zaharrak haur zirenekoak ere baziren!

Giro ederrean afaldu ondoren (San Jakoboak, ezin zuen beste era batean izan), gaubelaren garaia heldu zen: abestiak, dantzak eta antzerki oso oso ederrak eduki genituen bertan. Musikalak, txapelketak, koreografiak... aspaldian ikusi den gaubela dibertigarrienetakoa izan zen gau hartakoa! Guztiak izugarri sartuta beren paperetan eta ondo pasatzeko sekulako gogoarekin!

Hurrengo goizean eguraldi txarrarekin esnatu ginen arren, gosaldu ondoren pista joku bat egin genuen, etxe barru eta kanpotik. Kexaren bat espero genuen euria zela eta, baina han abiatu ziren monitore ohi guztiak txintik esan gabe eta poz-pozik euripean korrika, pistak bilatzera! Talderen batek tranpa egin zuen arren (jarritako pisten erdia saltatu zituzten!), jolasa primeran joan zen, eta eguraldia gorabehera, denok pasa genuen izugarri ondo.

Bazkaltzeko haragi pastela jan genuen (hau ere Aratzen tipikoa), eta kafearen ostean, etxea txukundu eta jaso genuen. Azkenik, kalean borobil handi bat egin eta agurra abestu genuen eskutatik helduta, batzuk iribarrea aurpegian, besteak korapiloa eztarrian, gehienak gauza biekin.

Asteburu eder, dibertigarri, melankoliko eta atsegina, urteurrena ospatzeko primerakoa. Eskerrik asko bertara etorri zineten guztiei, eta muxu bat etortzerik eduki ez zenutenei. Oso polita izan zen.
Beste 30 bete ditzagula!!

Aste santua Santiagomendin.

2008-04-09T20:01:00.008+02:00

Aste Santuan Santiagomendira joan ginen aratzkideok 4 egunetako irteeran. Astearte goizean autobusa hartu genuen Astigarragaraino, eta handik oinez igo ginen, euripean izan arren. Heldutakoan, etxea goitik behera aldatuta topatu genuen! Sukaldea, jangela, komunak, gelak... guztia desberdin zegoen! Baten bat galdu ere egin zen han barruan...

Eguraldiak ez zigun batere lagundu, euria, euria eta euria eduki baikenuen (nahiz eta koxkorrak ausartu ziren ibilalditxo bat egiten bigarren goizean, valientes!). Baina nahiz eta etxetik ia ez ginen irten, gauza piloa egin genituen! Aratzeko argazki zahar eta berriekin zenbait collage egin ziren, etxeko paretetan jartzeko; sukaldaritza tailerrak ere antolatu ziren, eta honek txokolatedun gaileta, "trufa" hotz (arraro xamarrak, Guggenheimerako moduko diseinuarekin atera ziren) eta torrija gozo-gozoak dastatzeko aukera eman zigun. Gero eta bizio handiagoak ditugu Aratzen postrearen orduan...
Mahai jolasak (batzuk trebeek eskuz egindakoak), gitarra sesioak, gaubeletan kantu eta dantzak, antzerkiak, masaje tailer laburren bat, froga jolasak... etxe barruan denetik egin daitekeela argi geratu zaigu Astigarragan igarotako egunetan.

Azken egunean Santiagomendi-Dakar lasterketan parte hartu genuen guztiok. Goizean, talde bakoitzak zenbait tailer edota proba-zirkuitu desberdinetan beren autoari jartzeko piezak lortu behar izan zituen. Gurpilak, direkzioa, kontsumoa, karrozeria, klimatizadorea... lortutakoaren arabera, arratseko lasterketan abantaila edo desabantailak eduki zituen. Lasterketa honetan gorabehera ugari eduki zituzten partehartzaileek, baina kotxe guztiek bukatu zuten osorik eta pilotuek onik, nahiz eta inor ez zer Dakarreraino heldu...

Amaitzeko, gauean beldurrezko gaubela egin genuen. Santiagomendiko etxea psikiatriko bilakatu zen ordun batzuetan, eta haurrek bertan zeuden pertsonaien artean nor ez zegoen erotuta bilatu behar izan zuten. Maitale bikoteko kideren bat ote zen? Bere burua zerraz mozten zuen neska? Sukaldean aulki bati lotuta zegoena? Eskuetako hatzak jaten zituena? Borrokan zebiltzan militar enmaskaratuak? Eskilaratako mutikoa? Aukera ugari eta arrisku handia brometan aritzeko... Hala ere, batzuek bizkorrak izan ziren eta azkenean antzeman zuten nor zen eroetxean egon behar ez zuena.

Azken egunean dena jaso eta garbitu ostean, bazkaldu, motxilak hartu eta aldapan behera abiatu ginen, Astigarragan autobusa hartu eta etxera itzultzeko.

Hurrengoa, kanpaldia!!

Pentsamendu Eguna

2008-04-02T20:39:00.005+02:00

Otsailaren 24ean Iruzun eta San Martzial taldeekin batera “Pentsamendu eguna” ospatu genuen. Munduan dauden ehundaka eskaut taldeek Otsailaren 23 guztiak ospatzen dituzte, izan ere, egun horretan jaio zen euren sortzailea: Baden Powell. Egia esan, edozein aitzakia erabiltzen dugu txango bat egiteko eta primeran pasatzeko.

Hala egin genuen. Igande horretako goizeko hamarrak aldera elkartu ginen Iruzun eta Aratzeko kideok Donostiako Renfeko estazioan Irunera abiatzeko asmoz. Ordu erdiko bidaitxoa eta gero Irunen geunden eta hantxe genituen zain San Martzialeko Taldeko irundarrak.

Behin hauen lokalean geundenean, bildu ginen hiru aisialdi-taldeetako haur eta begiraleak nahastuz, lau talde handi egin genituen, zeintzuk Guadalupeko ermitara lau bide ezberdinetatik igo ziren. Irundarrek bide potitetatik eraman gintuzten eta oso giro atsegina eduki genuen tipi-tapa genbilen bitartean.

Guadalupeko-ermita ondoan dauden belardietan hainbat jolas handi egin genituen. Primeran pasatzen ari ginen bat-batean euria hasi zenean eta, momentu horretan, Hondarribira jaistea erabaki genuen.

Hondarribin estalitako frontoi batean jan geunen etxetik ekarritako bokata goxoa. Pittin bat deskantsatu eta gero, motxilak hartu eta Hondarribiako alde-zaharrera joan ginen. Bertan, beste sei taldetan banandu ginen beste jolas handi batera jolasteko.

Mapa batetaz lagundurik, bazter eta txoko guztiak ezagutu genituen. Bidetik, Hondarribia hobeto ezagutzeko galdera eta froga desberdinei egin genien aurre eta, horietako bakoitzarekin, puntuak lortzen genituen. Lehia bizia egon zen amaieran txapeldun atera ahal izateko, talde guztiek puntu dezente irabazi baitzituzten.

Hondarribiko jolasa amaitutakoan, San Martzial Taldeko lokalera, Irunera, itzuli ginen eta, han, txokolate bero bat zegoen gure zain: honek eguna guztiz biribildu zuen (ze goxoa zegoen!).

Orokorrean, nahiz eta eguraldi kaxkarra izan, ezin hobeto joan zen eguna. Leku politak, lagun berriak eta jolas dibertigarriak eduki genituen, beraz hurrengo urteko pentsamendu egunean; gehiago!

Asteburua Berastegin

2008-03-08T12:16:00.008+01:00

Lehengo asteburuan oinarinek hiruhileko honetako abentura gauzatu genuen, asteburu-pasa eder bat egitea Berastegin! Ostiral arratsaldean erosketak egiteko geratu ginen, eta beharrezkoa izango genuen janari guztia erosi ondoren, Norteko geltokian trena hartu eta Tolosara abiatu ginen. Bertan, Tolosaldea autobusa hartu genuen, Berastegiraino eraman gintuena.
Heltzerako gaua zen jada, etxera heldu eta bertan instalatu bezain laister afaria egiteari ekin genion beraz. Etxeko jangelan bapo afaldu ondoren, gaubelatxo bat ere egin genuen, abesti, dantza eta jolasen batekin (ezkutaketan aritzeko bikaina da etxea!). Gauean, oinarin guztiek elkarrekin egin zuten lo ganbaran, eta monitoreek beheko solairuko gela batean.
Hurrengo egunean, goizeko 7:30tarako oinarinak futbolin eta ping-pongean jolasten ari ziren! Ondo pasatzeko aukera dagoenean, bost axola loak, itxuraz... Hala ere, 10:00ak aldera arte ez genuen gosaldu.
Goizean nazioarteko triathloi bat jokatu genuen, dedikazio handia eskatzen zuten hiru kirolez osatutakoa: ping-ponga, futbolina eta dardoak. Herrialde galtzaileek prendak beteko zituzten gainera, denok esfortzu handia egin genuen irabazteko beraz. Han ikusi genituen Jamaikarrak lepoan ezkilak zituztela bueltaka, argentinarrak eskilarak oin bakarrarekin igo eta jaisten, oin-flexioak egiten eskutan bizikleta bat zutela... denetik ikustea tokatu zitzaigun. Hura panorama...
Arratsean gymkana bat antolatu zuten oinarinek; koreografiak, patinete-piloto jaurtiketak, hockey-punteria probak, sokasaltoa... ez zen ezer falta, egia esateko! Azkenean, iluntzen ari zuela eta, etxe alboko frontoiko fokoak piztu eta palan ere aritu ginen ratotxo bat.
Gaubelan antzerki eder bat egin zuten oinarinek, eta koreografia original xamar bat ere ikusi ahal izan genuen, zenbait dantza eta kanturen artean. Ondoren, jangelan eserita lasai-lasai pasta batzuk jaten eta tertulian aritu ostean, zakura joan ginen denok leher eginda.
Azken egunean etxea goitik behera garbitu eta txukundu genuen. Denbora soberan genuela ikusita, berriro ere ping-pong eta futbolin saioak eduki genituen, gitarra kontzertuak, eguzkitan siestatxoren bat... gainera, sekulako eguraldi ona eta tenperatura goxoa genituenez, arratsaldea ur-gerra txiki batekin amaitu genuen.
Azkenik, oinarinek euren artean arropa aldatu (prenda bat izan zen hau), eta berriro Donostiarantz abiatu ginen, autobusez eta ondoren trenez. Sekulako asteburu ederra izan zen.

2008ko Ihauteriak

2008-02-11T16:04:00.000+01:00

Igaro dira gabonak, San Sebastianak, kaldeleroak eta, tartean, Aratzekook bigarren hiruhilekoan sartu gara burubelarri. Bi asteburutan zehar ihauteriak izan dira gure ekintzetako erdigunea eta adar guztiak batera primeran pasatzeko balio izan digu.

Aurreko astean Ategorrietan bildu ginen denak, urtero fetxa hauetan egiten dugun bezala. Koxkorren gehiengoa behiaz zetorren mozorrotuta euren titi, buztan eta adarrekin. Pirata batzuk Ategorrieta abordatu zuten oinarinak zirela esanez eta arabiar gazte batzuen bisita jaso genuen baita ere. Horietaz gain, dalmata txiki bat, euli erraldoi bat, txorimalo bat, edurnezuri bat baino gehiago, indio bat... ikusterik izan genuen.

Elkarrekin hainbat jolas egin eta gero, meriendatzera sartu ginen gure lokal barrura. Jateko prestatua zegoena di-da batean bukatu baino lehen (goseturik geundela esan daiteke), Urtarrilean zehar hainbatek (bi haur eta bi monitorek) urteak bete dituztela aprobetxatuz, hauei “zorionak zuri” abestu genien.

Hortik, gurasoak bila etorri arte, dantza eta jolas desberdinak egiten jarraitu genuen: “Kaleak eta etorbideak”, “semaforoa”, “muxu-stop”... Arratsaldea ziztu bizian igaro zitzaigun egia esan. Datorren asteburutik aurrera, Aste santuko irteera arte, adar bakoitza bere proiektu eta abenturetan murgilduko da.

Ordurarte, muxu bat denoi

2007ko gabonak

2008-01-16T17:15:00.000+01:00

Iragan diren gabonetan ere egin genuen irteera Aratz taldekook, urtero lez. Oraingoan Belabaratzera joan ginen, Oreretatik gora dagoen aterpea.
Haraino heltzeko, Donostian trena hartu genuen guztiok elkarrekin, eta Oreretaraino joan ostean, oinez joan ginen tipi-tapa aldapan gora Belabaratzeraino. Han kotxez erosketak egitera joandako monitoreak itxaron genituen, eta denok elkartutakoan bazkaltzen hasi ginen.

Hortik aurrera, adar bakoitza bere dinamikak egiten aritu zen. Irteera honetan ordu ugari sartu ditugu adar guztiek sukaldean, eta tripa ondo beteta eduki dugu Belabaratzen eman ditugun egunetan. Pittin bat erre zen Brownie bat, sekulako masa lodia zuten pizza erraldoiak, urdaiazpiko kroketa goxoak, bizkotxo paregabea... tripa-festa ederra ospatu degu han!
Gabonak zirela eta, plastilinazko jaiotza bat ere egin degu; San Jose (berezi xamarra), Maria (are bereziagoa...), Jesus haurra, idia, astoa, ardiak, laku txiki bat ahate eta guzti, Olentzero... Errege Magoak kenduta (hauen ordez bandera errepublikarra zuen), ez zuen ezer falta.

Hurrengo egunean adar bakoitzak bere ekintzak egin zituen: tailerrak, jolasak, San Markosera txango bat... baina egunari bizitasuna eman ziona I.K. izan zen, Inuxente Komandoa! Egun osoan zehar inuxentadak eman ziren Belabaratzen. I.K. izenpean ekiten zuen talde murritz baina eraginkor batek gutxien espero zuenari eta gutxien espero zuenean sorpresa bat eman eta egoera goitik behera aldrebesten zion! Jantzita dutxatan sartu, zutabe bati lotu, aurpegia margotu, espumaz bete... edozer gerta zitekeen!
Hala ere, ekintzarik handiena eta onena K.K taldeak sinatua izan zen, Karakol Komandoa. Izan ere, gau batean bertan genuen kotxeetako bat goitik behera prezintatuta azaldu zen, globo serpentina eta abarrekin! Sekulako parreak egin genituen ikusitakoan!

Hirugarren eguna Talde Eguna izan zen, eta Estatu Batuetan esnatu ginen guztiok. Eguna arraultza frijituak hirugiharrarekin gosaltzen hasi genuen. Monitoreok ikasle anaiarte batetakoak ginen, eta haurrak bertara sartu nahi zuten hasiberriak. Honetarako, meritu froga batzuk egin behar izan zituzten. Bazkaltzeko hamburgesak eduki genituen noski, buffet moduan antolatuta: bakoitzak bere hamburgesa eta ogia hartzen zituen, ondoren bere gustuko gehigarriak jartzeko: gazta, letxuga, mostaza eta beste hainbat osagai.
Arratsean, taldeek anaiarteko insignia topatu behar zuten, ezkutuan zegoena. Baina tranpatan harrapatuz gero, Guantanamora estraditatuak ziren! Argi ibili behar izan zuten insignia aurkitzeko!
Afalostean sorpresa handiena iritsi zen: gaubelarako dantzaldi erraldoia antolatu genuen, hasiberri guztiei gure anaiartera ongietorria emateko! Dantzak, abestiak, musika DJ baten esku, argi-efektuak, kea... ez zen ezer falta! Irteera amaitzeko era polita izan zen...

Hurrengo goizean etxea txukun-txukun eta garbi-garbi utzi ostean, trena hartu eta Ategorrietako lokalera abiatu ginen, bertan bazkaltzeko. Ondoren ebaluaketak egin eta futbol partida handi bat antolatu genuen frontoian, gurasoak noiz helduko zain...

Aste Santuan gehiago!!

Guaranoak, Biurrundarrak eta Koxkorrak II

2007-12-24T10:15:00.000+01:00

Koxkorren abentura bere amaierara iritsi da azkenean. Tolosan Gotzon izeneko shamán-a eta Iñaxita ezagutu ondoren, Guaranoen banderaren koloreak lortzen jarraitu dugu, Pablo Biurruni musikaz bizitzeko aukera ematearen helburuarekin.

Eta halaxe iritsi ginen azken egunera, Abenduaren 15a. Azkeneko kolorea lortu ondoren, Leize Gorria tabernara abiatu ginen eta bertan zeuden gure zain Oinarinak eta Azkarrak. Guztiok eroso jarritakoan, kontzertua hasteko garaia heldu zen.

Raul eta Julen izan ziren eszenatokira igo ziren lehenak, baina Pablo falta zen, noski. Bera agertu zedin, musika xuabe bat jo zuten Raul eta Julenek euren instrumentuekin fondo moduan eta, zertxobait itxaron eta gero, Iñaxita besotik helduta zuela agertu zen Pablo Leize Gorriko eskaileretatik behera; Biurrun and the Band hirukotea osorik zegoen berriz ere!

Hortik aurrera, festa hasi zen. Abesti ezagunen repertorio polit bat eskeini zuen hirukoteak. Abesti horietan guztietan Martinen (saxoa) eta Hugoren (gitarra) kolaborazioa eduki zuten eta emaitza ezinhobea izan zen.
Jende asko pasa zen mikrofonoetatik, izan ere, abesti ezagunei Aratzeko gaubeletako abesti eta dantzak gehitu zitzaizkien. Azkarrek korrikako abestiarekin lagundu ziguten, Unai koxkorrak Jaimitoren txiste izugarri on bat kontatu zigun, Jonek (koxkorra hau ere) bere gorputza dantzan jarri zuen...
Leize Gorria gainezka zegoen. Publiko artean, Koxkorren gurasoak, Pabloren senide eta lagunak eta Iñaxita zeuden, baita besterik gabe kaletik tabernara sartutako jendea ere. Giro bikaina sortu zen eta kostako zaigu ahaztea!

Guzti honen ondoren, Pablori bihotzez eskerrak ematea baino ez zaigu gelditzen; bere betebeharrerako laguntza eskatzearekin batera abentura polit hau bizitzeko aukera eman digulako. Gozatzen jakin izan dugula uste dugu, festa hau merezitakoa izan da hortaz.

Ezin dugu ahaztu ezta ere Leize Gorriak eta San Bernardo Eskaut Taldeak abentura honetan eskeini diguten laguntza; muxu handi bat hauentzat ere.

Kontzertua “La lluvia nunca vuelve hacia arriba” abestiarekin bukatu zen, izan ere, momentu on guztiek euren bukaera daukate, beste batzuei lekua utzi behar zaielako.

Muxu bat guztiontzat!

Santo Tomaseko postua

2007-12-16T20:30:00.000+01:00

Datorren ostiralean, Santo Tomas eguna, azkarrek postua edukiko dugu Gipuzkoa Plazan! Etor zaitezte txistorra artera!

Gure aurtengo proiektua Essex-en (Ingalaterra) ospatuko den Nazioarteko Kanpaldi batetan parte hartzekoa da. Hau aurrera eramateko ekintza desberdinak antolatuko ditugu urtean zehar: Sto. Tomas eguneko postua, Aratzeko azken garaiko argazki muntaia eta beste hainbat.
Anima zaitezte, hortaz, datorren ostiralean guri bixita bat egin eta txistorra jatera Gipuzkoa Plazako 8. zenbakian edukiko dugun postuan!
Mila esker, eta on egin!

Aratzeko Azkarrak

Leitzaranetik zehar bizikletaz

2007-12-07T18:35:00.000+01:00

Lehengo igandean oinarinak Leitzaran bailarara joan ginen bizikletak hartuta. Kurtso hasieran oinarinek beraiek proposatutako plana zen hau, orain arte prestatzen aritu garena. Ibilbidea, eraman beharrekoa, bizikletak puntuan jartzen ere aritu ginen... Hala, igandean Donostiako RENFEren geltokian elkartu ginen bizikleta eta guzti Andoainera abiatzeko, eguraldia lagun genuela.

Segituan ekin genion bideari, baina pittin bat desorientatu ginen, eta Leitzaran bailararen hasiera heltzeko atajo txiki bat inprobisatu behar izan genuen. Kontatzeko moduko zerbait eduki ahal izateko...
Hasierako asmoa Leitza herriraino heltzea zen, baina ez genuen lortu. 10 bat kilometro eginda genituenean, Maddi gizarajoari bizikletako katea hautsi zitzaion. Ez genuen hau konpondu ahal izateko erremintarik, eta handik bizikletaz igarotzen zirenei galdetzen genien arren, inork ez zeraman gainean halakorik. Kilometro t'erdi atzerago igaro genuen iturrira itzultzea erabaki genuen, bertan denok elkarrekin bazkaltzeko. Haraino Maddi bizikletan igota eta guk esku batekin bultzatzen eraman genuen. Hala edonor dabil bizikletaz, esfortzurik egin gabe!
Iturrian etxetik eramandako bokadiloak bazkaldu genituen, eta jolasean eta tertulian aritu ginen pixkatean. Amaitutakoan, Unai monitorea Maddirekin Andoainera itzuli zen (haraino bultzaka eraman zuen baita ere!), kafe bero bat hartu eta gainerakooi itxoiteko. Besteok berriro goruntz abiatu ginen bizikletaz.

Dena izugarri lokaztuta eta putzuz beteta zegoen, eta zenbait tunel izugarri ilunak zeuden, ez zen batere ikusten. Hala ere, izugarri gustura egin genuen bidea!
Orduak aurrera egiten zuela ikusita, 15. kilometro inguruan buelta ematea erabaki genuen. Zein erraz egin genuen beherako bidea! Ia Andoainen ginela beste gorabehera bat eduki genuen halere, Axeli atzeko gurpila zulatu baitzitzaion. Hala ere, segituan kamara aldatu, puztu eta aurrera jarraitu genuen. Han heldu ginen Maddi eta Unairengana, goitik behera lokaztuta eta poz-pozik. Bizikletak berriro ere trenean sartu, eta sekulako egunpasa ederraren ostean, etxerako itzulera egin genuen, neka-neka eginda.

Guaranoak, Biurrundarrak eta Koxkorrak

2007-11-20T17:54:00.000+01:00

Koxkorren adarreko kideok abentura ikaragarri batean gaude sartuak. Urriaren erdilaldea izango zen Pablo Biurrun izeneko gazte baten eskutitza jaso genuenean laguntza eske.

Pablo eta bere familia, orain dela hogei bat urte etorri ziren Uruguaitik Donostiara bizitzera. Pabloren herenaitona, Joxemari Biurrun, Uruguaira emigratutako euskaldun bat izan zen. Hango oihanetara (Tacuarembó-ko inguruetara) iritsi zenean, Guarano izeneko indigena batzuk ezagutu zituen. Haien ohituretaz maitemindu eta haien tribuko kide egin zen.

Gaur egun, Guaranoak Argentina, Uruguay, Paraguay eta Brasileko hiri eta herrietan bizi dira gehienbat. Jakin badakigu, Euskal Herrira herrialde horietatik jende asko etorri dela bizitzera eta noski, horietako zenbait Guaranoak dira, Pabloren familia bezala.

Pablok zoriontsu bizi izan ditu Donostian daramatzan urteak Guaranoen ohiturak alde batera utzi gabe. Txikitatik musika maite izan du eta arlo horren inguruan nahiko luke betirako bizi.

Baina hona hemen istorioaren korapiloa. Orain dela hilabete batzuk, Euskal Herrian bizi diren Guaranoek bilkura bat egin zuten, zeinetara Uruguaiko shaman jakintsu bat gonbidatu zuten. Honek Pabloren zaletasuna jakin zuenean, honakoa esan zion: “Musikaria izan nahi duzula? Baina, Pablo, ez al zenekien Guaranoek musika jotzea debekatuta genuela? Zorte txarra dakarkigu!”.

Pablok dilema horren aurrean, erabaki gogor bat hartu behar izan du: Guarano izateari utzi. Baina hori ez da lan makala, izan ere, Guaranoen aztikeri, konjuro eta erritoen arabera egin behar da hau. Horretarako eskatu digu laguntza koxkorrei.

Pablo betiko askatzeko prozedura honakoa da: Guaranoen banderaren hamabi koloreak lortu behar ditugu. Koloreak eskuratzeko, Pablok astebururo eskutitz baten bitartez esaten diguna egin behar dugu, eta noski, egiten dugun horrek Guaranoen ohiturak ezagutzeko balio digu.

Datorren Abenduaren 15an Pablok, Raul eta Julenekin batera osatzen duen musika taldeak (Biurrun and the Band) kontzertu bat dauka hitzartuta Leize Gorria tabernan. Hamabi koloreak ordurako lortzen ez baditugu, Pablok ez du kontzertu garrantzitsu horretan jotzerik izango.

Denboraz nahiko larri gabiltzanez koloreak era azkarrago batean lortzeko moduren bat behar genuen. Pablok bazekien Tolosan Shaman-agiria duen Guarano gazte bat bizi zela eta harengana bidali gaitu pasa den asteburuan aholku bila.

Guarano honek Gotzon du izena eta segituan jarri gintuen lanean, bere konjuroarentzat behar zituen osagaiak Tolosan zehar bilatzera bidaliz (Gorrotxategiko Konfiteri Museoa ere ikusi behar izan genuen. Han azaldu ziguten nola egiten zen txokolatea; Guaranoentzat botere berezia duen jakia).

Horren ostean, Gotzonen inguruan eseri ginen begiak itxita. Gotzonek arnasa hartu zuen eta bere konjuroari ekin zion konzentrazio osoz. Bere ahotik Tolosan bizi den emakume baten izena atera zen; Iñaxita. Baita honen helbidea ere, eta garrantzitsuena, bere bigarren abizena; Biurrun.

Iñaxitarenean agertu ginenean, honek guztiz harrituta ireki zigun atea. Baina Uruguaira joandako arbasoren bat ote zuen galdetu genioenean aurpegia aldatu zitzaion eta, hara non ezustekoa; Joxemari Biurrun, hau da, Pabloren herenaitona, Iñaxitaren amaren osaba zen.
Hori gutxi balitz, Joxemarik Uruguaitik bidalitako eskutitz bat zuen gordeta. Eskutitz horretan bere familiari agur egiten zion betirako, hortik aurrera Guarano artean bizi behar baitzuelako. Eskutitzaren amaieran, bere azkenengo borondatea eskatzen zuen ohar txiki batean zegoen: “Gorde ezazue arren, eskutitzarekin batera bidali dizuedan kutxa hori. Belaunalditik-belaunaldira gorde ezkero, honen barruan dagoenaren bila norbait agertuko da etorkizunean. Halaxe dio nire tribuko txamanak egindako profeziak”.

Iñaxitak altxor bat bezala gordeta zuen kutxa atera zigun eta bertan lau kolore zeuden. Ezin genuen sinetsi; Aratzeko Koxkorrak orain dela mende bat egindako profezia baten protagonistak! Guri esker, Iñaxita eta Pablo ezagutu ahal izango dira eta euren familia bere osotasunean ezagutzeko aukera daukate hemendik aurrera.

Zazpi kolore ditugu jada. Gai izango ote al gara, Abenduaren 15a baino lehen hamabi koloreak lortzeko?

Martxan gara berriro!

2007-10-18T16:34:00.001+02:00

Jada jarri gara martxan Aratzen ere bai! Joan den asteburuan kurtso hasierako irteera egin genuen, Urnietara (azken urteotan beti egiten dugu han lehen irteera!).Aurtengoan ohi baino irteera motzagoa eduki dugu, zubiak ez baitzuen 3 egunetarako baino ematen. Hala ere primeran aprobetxatu ditugu 3 egunak, eta izugarri ondo pasatzeko denbora nahikoa eduki dugu!

Ostiral goizean Donostiako Norteko geltokian elkartu ginen denok, han trena hartu eta Urnietara joateko. Zenbait haur berri dauzkagu aurten eta baita monitoreren bat ere (ongietorri guztiei!!), eta Urnietara heldutakoan zenbait aurkezpen jolas egin genituen, elkarren izenak ikasten hasteko. Brilet eta futbol partidatxo pare bat jokatzeko astia ere izan genuen bazkalorduaren aurretik. Bazkaltzeko bakoitzak bere etxetik eramandakoa atera zuen eta denon artean segituan amaitu genuen janariarekin, bokadilo eta gainerakoan guztion artean banatuaz.

Arratsaldean adarrek dinamika desberdinak egin zituzten beren monitore berriak ezagutu eta guztien artean konfidantza hartzen hasteko. Koxkorrek pista-joku moduko bat egin zuten non proba ezberdinak ere gainditu behar zituzten. Primerako eguraldia egiten zuela aprobetxatuta batera eta bestera korrika aritu ziren etengabe, etxe barrutik eta kanpotik zehar. Amaieran diploma banaketa ere eduki zuten, talde bakoitzaren lorpenen araberakoa.
Oinarinek proba-jolas bat egin zuten konfidantza eta ezagupen dinamika ugari zituena, taldea eratzen hasi zedin. Hasieran lotsati pare bat baziren arren, segituan gainditu zuten lotsa eta oso gustura aritu ziren jolasa aurrera zihoan heinean.
Azkarrek ere ezagupen jolas bat egin zuten galdeketa moduan, nahiz eta tranpak egiten amaitu zuten, elkarri kopiatzen (nola kopiatu daiteke ezagupen jolas batean??). Zenbait konfidantza jolasekin amaitu zuten arratsaldeko dinamika.
Azkenik, trebeek tailer bat antolatu zuten eskultismoaren inguruko liburu zahar batetik hartutako ideiekin, eta korapilo mural eder bat egin ziguten, korapiloen izenak eta guzti jarrita.
Gauean denok ganbaran elkartu eta gaubela eder bat egin genuen, abesti, dantza eta antzerkiekin.

Irteera normalean baina motzagoa zenez, bigarren eguna azkenaurrekoa ere bazen, Talde Eguna beraz. Kontu eta finantzen erregeak bilakatu ziren egun batez gure haurrak. Adar guztiak nahastu eta lau taldetan banatu ostean, kirol apustuekin hasi genuen eguna: talde bakoitzak diru kopuru jakin bat zuen, eta kirol desberdinak zituen aukeran beste talde baten aurka aritzeko. Aurrena kopuru bat jokatzen zuten, irabazteko ikusten zituzten aukeren arabera. Ondoren beste taldearen aurka lehiatu, eta irabazleak dirua jaso eta galtzaileak dirua galtzen zuen. Futbola, saskibaloia, sokatira, “arrauna”, ur-garraio lasterketa... kirol ugaritan hartu zuten parte!
Arratsaldean irabazitako sosak administratzen aritu ziren, Monopoly erraldoia antolatu baikenuen! Loiola, Alde zaharra, Antiguo eta Intxaurrondon kaleak erosi eta etxeak eraikitzen aritu ziren, eta beste talderen baten jabetzatan eroriz gero froga desberdinak egin behar izan zituzten ordaindu nahi ez bazuten. Hazienda ere han zehar zebilen zerga bidez taldeei dirua kentzen, eta baita Robin Hood ere dirua banatzen. Negozio arteko arratsalde dibertigarria igaro genuen larunbatean.
Amaitzeko, gauean Kasino batera gonbidatu genituen haur guztiak. Bertan kabaret ikuskizun moduko bat eduki zuten, zenbait antzerki emanaldi, eta geratzen zitzaien dirua zorte-joko desberdinetan: dado-pokerra, poker gezurtia, zazpi t’erdia, indioa... Diru mordo ederrak erraztasun handiz mugitu ziren gure kasino partikularrean, guztion gozamenerako.

Azken egunean dena garbitu, jaso eta txukun utzi ondoren, borobilean eserita bazkaldu genuen kalean, eguzki ederra baikenuen. Amaitzeko agurra ere abestu genuen, eta trena hartzera abiatu ginen, gurasoengana joateko.

Martxan jarri dugu aurten ere Aratz, eta handia izango da martxa hau! Hasi dugu ikasturtea!

Eskaut mendeurrena

2007-09-23T19:41:00.000+02:00

Lehengo asteburuan Donostian Eskaut mugimenduaren mendeurrena ospatu genuen. Larunbat goizean San Marcial, Iruzun eta Aratz taldeko haur eta monitoreak Boulebardean elkartu ginen, mendeurrenari hasiera emateko asmotan. 110 pertsona inguru elkartu ginen bertan, painoleta lepoan eta motxila bizkarrean, asteburu paregabea pasatzeko prest. Alderdi Ederrera abiatu ginen, bertan kamioi bat baikenuen zain haurren motxilak Uliara eramateko, bertan akanpatzea baitzen plana. Hala, haurren trasteak jaso eta denon artean jolas erraldoi bati ekin genion.

Hiru taldeetako haurrak nahastu eta taldetxo txikietan banatu ondoren, Donostiako zentro guztitik zehar pista joko erraldoi batean hartu genuen parte. Helburua puzzle handi bat osatzeko piezak lortzea zen, eta honetarako proba desberdinak egin behar izan zituzten. Kaian, Boulebardeko kioskoan, Santa Maria eliza aurrean, Artzai Onaren katedrale aurrean, kontxa hondartzarako jaitsieran, Konstituzio plazan... toki guztietan geunden banatuta zenbait monitore. Gugana heltzeko pista ugari argitu behar izan zituzten, eta hurrengoa lortu ahal izateko agindutako probak bete. Sekulako barreak egin genituen denok, nahiz eta haur batzuk lotsatu xamar ere egon ziren momentu batzuetan...

Pieza guztiak lortutakoan, Okendo plazan elkartu ginen denok puzzlea osatzeko. Haur txikienei utzi zieten lan hau, eta laguntza pittin bat behar izan zuten arren, lortu zuten osatzea. Ondoren, denok borobilean eseri eta bakoitzak etxetik ekarritakoa banatuaz bazkaldu genuen.

Bazkalostean Zurriolako hondartzara abiatu ginen denok, jolasekin jarraitzeko prest. Bertan "Burro"-an aritu ginen, karta erraldoiekin. Primeran pasa genuen denok ia bata bestearen gainean "Burro!" entzuten zen bakoitzean! Tranpati batzuk eduki genituen arren, oso dibertigarria izan zen. Ondoren "Muxu-plakaje" jolasa ere egin genuen, ekipoka banatuta. Hau ere oso ondo atera zen, nahiz eta haur batzuei jolasaren dinamika ulertzea kostatu zitzaien, hasierako partidak xelebre xamarrak bilakatu zirelarik.

Amaitutakoan, hondarra ahal genuen neurrian astindu eta gero, Uliara abiatu ginen denok oinez, Sagues atzeko bidetik. Txango polita izan zen, nahiz eta dezente izerditu genuen, eguraldia bero xamarra baitzen. Uliako tiro zelai zaharrera iritsitakoan jada muntatuta zegoen kanpaldia goitik behera ikusi, eta motxilak errekuperatu ostean kanpin dendatan banatu ginen denok.

Pañoletas Blancas taldeko kideak arduratu ziren ia azpiegitura guztiaz eta intendente lana ere beraiek bete zuten. Hala, 9ak aldera denok borobilean eseri ginen lurrean, eta kanpaldietako ohiko afaria egin genuen: saltxitxak patata purearekin, eta baita xolomo xerra batzuk ere. Afalostean, nola ez, gaubela eder bat ospatu genuen gitarren doinupean. Amaitutakoan, haurrak dendatara bidali, eta lotan jarri genituen.

Hurrengo goizean, jaiki, gosaldu eta hortzak garbitu ondoren, eskaut zahar eta gurasoak hasi ziren heltzen. Aspaldian elkartu gabeko jendeak egin zuen topo Ulian, garai zaharren omenez. 350 pertsonatik gora elkartu ginen bertan. Goizeko ekitaldi nagusian zenbait gonbidatu berezik hitz batzuk eskaini zizkiguten, eta ondoren bezperan haurrekin egindako kandelak piztu eta eskatu mugimenduari "Zorionak zuri" abestu genion denon artean. Honen ondoren, lunch paregabea eduki genuen bertan elkartu ginen guztiontzat, honetarako prestaturik zeuden mahaietan.

Honen ondoren, denbora libre pixka bat eduki genuen, nahiz eta haurrentzat jolas eta tailer txiki batzuk antolatu genituen, asper ez zitezen. Tarte honetan, guraso eta eskaut zahar ugari garai zaharretan bezala elkartu, borobilean eseri, eta gitarra eskutan hartuta beren eskaut garaietako kantuak abesten aritu ziren (gaur egun oraindik abesten ditugunak). Giro izugarri polita sortu genuen Ulian.

Bazkalorduan, ausart batzuek mahaietan bazkaldu zuten, baina jotzen zuen eguzkia ikusita, gutako gehienek orduantxe inprobisatutako itzalaren azpian bazkaldu genuen, bi pabelloi eta zenbait toldorekin egindakoa. Gehienok lurrean eserita bazkaldu genuen hortaz, oraingoan ere kanpaldia balitz bezala.
Digestiorako tarte bat utzi ondoren, Ulian ginen guztiok borobil erraldoi batean jarri eta dantza jolas batzuk egiten aritu ginen, haur, guraso, monitore, "vieja gloria" eta bestelakoak denak elkarrekin. Hauen ostean, denok eskutik heldu eta Agurra abestu genuen.

Sekulako asteburu ederra igaro genuen, eta askorentzat oso esperientzia berezia izan zen, aspaldiko lagunekin berriro kanpaldi giroa nolabait bizitzea.

Eskerrak ematen dizkizuegu hau antolatzen lagundu diguzuen guztioi, eta baita bertara azaldu zinetenei ere. Merezi izan du eta.

Hemendik beste 100 urtetara berriro!

100 urte

2007-08-29T12:44:00.000+02:00

2007a urte berezia da eskaut-gia talde guztiontzat, eskaut mugimenduaren mendeurrena baita. Hau ospatzeko, ekintza berezi batean hartuko dugu parte Gipuzkoako eskaut-gia talde guztiok, Irailaren 15 eta 16an ospatuko dena Donostian. Pañoletas Blancas, Iruzun, San Bernardo, San Marcial eta Aratz osatzen dugunok kanpaldi bat antolatuko dugu Ulia mendian, eta zenbait jolas eta ekintza Donostiatik zehar.

Larunbata haurrei zuzendutako eguna izango da, goizetik gauera arte jolas erraldoi batetan hartuko baitute parte. Arratsaldeko ekintza amaitu ostean, Uliara igoko gara oinez, bertan afaltzeko. Gaubela ere edukiko dugu, eta bertan egingo dugu lo, kanpin-dendatan.
Igandean ekitaldi irekia ospatuko dugu, eskaut, "vieja gloria", guraso eta etorri nahi duen edonori zuzendutakoa, bazkari eder batekin lagunduko duguna. Ospakizuna amaitutzat emateko, igande arratsaldean beste zenbait ekintzetan hartuko dugu parte, eta azkenik eskaut agurra abestuko dugu denok elkarrekin.

Informazio gehiagorako ikusi mendeurrenaren programa, Pañoletas Blancas taldearen helbidean.

Tubilleja 2007

2007-08-27T17:10:00.000+02:00

2006-2007 kurtsoari amaierarik hoberena emateko kanpaldira joatea falta zitzaigun, urteko ekintzarik gustagarri, polit eta dibertigarriena. Igarotako azken bi urteetan Pirinioetara joan gara, baina aurten Burgoseko iparraldera jo dugu, Tubilleja de Ebrora. Bertako jendeak oso ondo hartu gaitu eta hamabost egunetan zehar, oso inguru ederrean bizitzeko aukera izan dugu.

Urtero bezala, Uztailaren 15ean goizeko 10etan bildu ginen Anoeta estadio ondoko Xanti tabernan. Egun honetan urduritasunak jota eta urdailean korapilo bat dugularik jaikitzen gara Aratzeko kideok, autobusa irten arte irauten duena (eta batzuetan pittin bat gehiago ere!). Xantira iritsi eta ordu erditxo beranduago, gurasoei muxu pila eman ondoren Tubillejaruntz abiatu ginen Bilbo, Laredo, Solares eta Ebroko urtegitik eraman gintuen bost orduko bidaia batean.

Lehen eguneko arratsaldean eta hurrengo egunean zehar egonaldi osoan erabiliko ditugun konstrukzio eta egitura guztiak eraiki ohi ditugu: dendak, intendentzia, fregaderoak, letrinak, zanjak... hau da, gure ekintzak ahalik eta erosoen aurrera eramateko behar dugun guztia. Aurtengoan, gainera, berrikuntzaren bat aurrera eramaten saiatu gara, nahiz eta ondoren ez duen askorako balio izan. Sekulako ingeniariak eginda gaude...

Hirugarren egunean hasten dira ekintzak, hortaz. Urtean zehar larunbatetan eta irteeratan egiten ditugunen antzerakoak dira hauek, baina hamabost egunetako konbibentzian eta naturan bertan egoteak egundoko aldea suposatzen du, noski. Ez da gauza bera froga-jolas bat Donostiako zentroan egitea, edo kanpaldian egitea, non bost axola dizun zikintzeak, lurretik ibiltzeak, sekulako zarata ateratzeak eta bustitzeak.

Gaubelak ere ia gauero edukitzen ditugu. Hauetan abesti, dantza eta joko desberdin asko tartekatzen dira eta egunak amaitzeko erarik hoberena dira. Batzuetan haurrek antzerki edo antzerakoak ere eskaintzen dizkigute, eta aurtengoan azkarrek sekulako beldur-gaua prestatu dute gainerako guztiontzat (trebeen laguntzarekin).

Kanpaldian zehar, koxkorrek “denboraren tunelaren” bidez hainbat garai desberdinetara bidaiatu dute egunero. Faraoien garaiko Egipton egon dira, antzinako Greziako Olinpiadetan parte hartu dute, Megalitikoa ere ezagutu dute, urruneko etorkizunean egoteko aukera eduki dute eta XVII. mendeko piratekin Ebro ibaian zehar nabigatu dute, ron botila esku batean eta ezpata bestean zutela. Garai bakoitzean eginkizun desberdin bat eduki dute koxkorrek denboran atzera eta aurrerako salto hauen zentzua topatu ahal izateko.

Oinarinek ekintza ugari egin dituzte, azkarren moduan: body painting, globoflexia, hausnarketa ekintzaren bat, barku eguna, koxkorrentzat ekintzaren bat prestatzea... ile-apaindegi tailer bat ere egin dute, eta guztiek amaitu dute ilea tindatuta, moztuta edo bi gauzak batera. Eskerrak gurasoak halakoetara ohituta dauzkagun...

Trebeek, arazo txiki bat zela medio zenbait inprobisatu behar izan dituzten arren, egin dituzte tailer eta ekintzak kanpaldian zehar. Hala ere, ez dute denbora askorik eduki, 7 egunetako ruta egin eta egun bereziak kendu ostean, ez baitzitzaien denbora askorik geratzen euren ekintzetarako.

Parkoutak ere eduki ditugu aurtengoan (froga joko nahiko gogorra). Anekdota moduan, kanpaldi honetan trebe batek eta bi monitorek parte hartu dute parkoutean, sekula egin gabea zutelako. Bitxia izan da haurrentzat hauek parkouta egiten ikustea, eta oso dibertigarria beraientzat, esperientzia berria izan baita.

Rutari dagokionean, Burgos aldera gindoazela jakiterakoan lurralde bero, lehor eta laua etorri zitzaigun burura. Baina Burgos oso handia da eta baditu bere paraje berde eta menditsuak. Haietatik zehar egin ditugu rutak adar guztiek eta noski, lau egunetan zehar herritik herrira ibiltzen anekdota ugari gertatzen dira.

Koxkorrak, liluraturik gelditu ziren Munilla izeneko herri ñimiño batean. Gaua bertan pasatzeko asmoarekin heldu ziren bertara, eta han Mikel izeneko bilbotar bat ezagutu zuten. Honek, Hegoamerikatik zehar bidaia ugari egin zituela kontatu zien, eta herrialde haietatik instrumentu ugari ekarri zituela. Hauekin kontzertutxo bat ematea eskaini zien haurrei gauean, eta batek baino gehiagok, zakuan zegoela aprobetxatuta, Mikelen musika entzunaz lo hartu zuen.

Oinarinek ere ruta musikatua eduki dute. Izan ere, Dobro herrira heldu zirenean han gaua pasatzeko, herriko festak zirela ikusi zuten. Gauean berbenan bueltaxka bat eman ostean, bertako polikiroldegira joan ziren lo egitera. Sorpresa hurrengo goizean etorri zitzaien, herriko gazteak joan baitziren oinarinak esnatzera, batukada eder batekin. Danbor, tinbal eta kaxen erritmoan hasi zuren eguna gure oinarinek!

Azkarren aurtengo ruta oso berezia izan da, oinez beharrean bizikletaz egin baitute. Hala inguruko paraje, herri eta toki ugari ezagutzeko aukera eduki dute, oinez baina askoz ere kilometro gehiago egiteko aukera ematen baitu bizikletak. Sekulako mendi portuak igo dituzte (eta alforjek bizikletari gehitzen dioten pisua ez da broma), baina esfortzuak merezi izaten zuen ondoren aldapan behera gozatzeko. Ebroko urtegian ere bainu bat hartzeko aukera ere eduki dute, eta Orbaneja del Castillo bezalako herri zoragarriak bixitatu dituzte. Esperientzia berria eta oso ederra izan da azkarrentzat ruta bizikletaz egitearena.

Trebeek 7 egunetako ruta egin dute aurtengoan. Iruzun taldearen kanpaldia bixitatu dute, gugandik ez oso urruti baitzeuden. Talde honetako trebeekin batera Brizuelako festetan ere egon ziren gainera, euren sabelak txarangen erritmora betez. Ikusten duzuen moduan nahiko ruta musikatuak eduki ditugu aurtengoan!

Honetaz gain, ohiko egunak eduki ditugu kanpaldian: koxkor eta oinarinek superbibentzia egin dute inguruko herrietan, eta lan handia egin beharrik gabe sabelak ondo beteta zituztela itzuli dira kanpaldira; azkarrek Tudancatik gora joanda Raid-a egin dute, eta musker bat adoptatzeko aprobetxatu dute (izena eta guzti jarri zioten, sekulako entretenimendua); Sukaldaritza Egunak ere egin dituzte adar guztiek, eta monitoreok tripa bete-beteta utzi gaituzte; eta azken egunean, betiko moduan, Talde Eguna eduki dugu.

Goizeko jolasa eta Italia-Abisinia egin ostean (lokatzez estalita amaitzen dugun urteroko jolasa), arratsean feria bat antolatu genuen kanpaldian: “zezen mekanikoa”, ahatetxoen arrantza, punteria jolasak, txaranga, karta-jolasen bat, etorkizuna iragartzen zuen pitonisa, sangria banatzen zuen postua... denetik eduki genuen bertan. Eta gauean gaubela berezi eta eder bat genuen prestatua, nahiz eta arazo teknikoren bat zela medio ez zen pentsatu bezala atera.
Amaitzeko, adar paseak egin genituen, zenbait oinarin datorren urtean azkarrak izango baitira, eta aurtengo azkar guztiak trebe bilakatu dira dagoeneko. Honetaz gain, haurrek lehenago prestatu zuten abesti bat kantatu zuten, taldea utziko duten zenbait monitoreri agur esateko. Era polit eta hunkigarrian amaitu genuen kanpaldiko azken gaua, hortaz.

Azken egunean kanpaldia jaso, dendak desmuntatu, zabor-batida egin eta bazkaldu ostean, malenkoniak jota batzuek autobusa, besteek furgoneta eta azkenekoek autoa hartu eta Donostiarantz abiatu ginen. Amaiera dibertigarria eduki zuen bidaiak, hala ere. Xanti tabernara iristerakoan autobusean zihoazen haur eta monitoreei, gurasoei egundoko broma bat egitea bururatu zitzaien. Autobusean Xanti parean gelditzearekin batera, denak (txoferra ezik noski) makurtu egin ziren barruan inor ez egotearen itxura emateko asmoarekin. Baita lortu ere, baina bat, bi eta hiru esaterakoan denak salto batean agertu ziren kanpoan zegon mundu guztiaren barreak eraginez.

Datorren urtean gehiago!

Irla Eguna 2007

2007-07-09T12:48:00.000+02:00

Denboratxo bat generaman udako egun luze eta beroak disfrutatzen. Bazen garaia, beraz, urtero bezala, Donostiako Santa Klara uhartean egun pasa egiteko, eta horrela egin genuen igaro den hileko azkeneko ostegunean.

“Irla eguna” Donostiako Iruzun eskaut-gia taldeko kideekin batera egiteko ohitura daukagu. Beraiek ere kanpaldia egingo dute laister eta honetarako dauzkaten planak kontatu dizkigute aurtengoan ere (Burgos aldera doaz, beraz gertu izango ditugu!).

Goizeko hamar t´erdietako itsasontzia hartu genuen eta bost minutuko bidaitxoa egin eta gero, irlan geunden. Trasteentzako leku bat bilatu ondoren, hainbat jolas egin genituen Iruzun eta Aratzeko kideon izenak eta aurpegiak ezagutzeko. Gero, krema eman ondoren, toailak hartu eta bainu luze bat ematera jaitsi ginen uharteko hondartzara.

Uretan a,e,i,o,u-ra jolasten, karramarroak bilatzen, inguruak ezagutzen eta beste hainbat gauzetan ibili ginen goizean zehar. Gustora hartu genituen, hortaz, etxetik ekarritako bokata goxoa eta ondorengo atsedentxoa.

Arratsaldean, jolasteko gogoa piztu zitzaigun berriz eta horretarako lau taldetan banatu eta uhartean zehar froga desberdinez osatutako zirkuito dibertigarri bat egin genuen. Bukaeran, “giza-piramidea” eta “kate-korapilatua” bezalako frogak bete eta gero, talde bakoitzak denen artean asmatu beharreko hieroglifiko baten zati bana lortua zuen. Honi esker, uharteko sorosleek saria emango zigutela jakin genuen.

Sei t´erdiak aldera abiatu ginen portura eta han zeuden gurasoak gure zain, baita sorosleek agindutako saria (izozki bana) ere.

Kanpaldian gutxi barru ikusiko garela jakinda agurtu genuen elkar!

Kurtso amaiera

2007-06-23T11:28:00.000+02:00

Jada udan sartu gara, eta Aratzentzat ere amaitzen ari da ikasturtea. Oraindik Irla Eguna eta kanpaldia falta diren arren, larunbatetako bilerak amaitu dira dagoeneko. Lehengo asteburuan adar guztiak elkartu ginen Ategorrietako lokalean, ikasturteari agur esateko. Pista-froga joko bat egin genuen handik zehar, ondoren zetorren merendola ederrean jan ahal izateko. Izan ere, talde bakoitzak segunduak lortzen zituen jokoan zehar, gero prest zeuden jaki guztiak jateko erabili ahal izango zituztenak. Talde bakoitzak denbora tarte bat zuen, hortaz, meriendatzeko! Azkenean denok batera eta denbora horri kasurik egin gabe jan genuen mahai gaineko guztia, nola ez. Baina ederki dibertitu ginen jokoa egiten...

Amaieran, gainera, monitoreotako baten azken eguna zenez (jubilatu egingo zaigu, eta ezinezkoa du kanpaldira etortzea) momentuan otu zitzaigun zenbait haurrek euskal dantza egiten dutela, eta Agurra dantzatu zioten (musika gainerakook abestu edo txistukatu genuen, ahal zen moduan). Polita geratu zen, inprobisatu xamarra izan arren.

Esan bezala, orain soilik Irla Eguna eta kanpaldia geratzen zaizkigu, aurten Tubilleja de Ebro-n izango dena (Burgos aldean). Larunbatetako bilerei dagokienean, datorren urtera arte, Aratz!

Jarri gurekin kontaktuan!

2007-05-05T09:50:00.000+02:00

Dagoeneko ikusiko zenituzten zuen auzoetako kale, kulturetxe, ikastola, haurtxoko eta gaztelekuetan gure kartel, foileto eta triptiko desberdinak. Pentsa dezakezuenez, gure taldea eta honen helburu eta ekintzak ezagutarazteko nahiean gabiltza, eta horretarako edozein zalantza edo proposameni erantzuna emateko irrikitan gaude.

Hortaz, edozer gauza nahi izanez gero, deitu edo idatzi lasai hemen alboan azaltzen diren helbide eta telefonoetara!

Aste santuko irteera

2007-04-28T10:31:00.000+02:00

Aurten ere, aste santuko oporretan 4 egunetako irteeratxoa egin dugu Aratz taldekook. Gainera, etxe berri bat ezagutzeko aprobetxatu dugu, Beizaman igaro baititugu egunak. Ez genuen etxea ezagutzen, eta egia esan poz-pozik geratu gara han topatu genuenarekin. Sekulako etxea, logela ugarikoa, handia, sukalde eta jangela ederrarekin, eta hau gutxi balitz, herriko frontoiari pega-pega eginda dagoena! Kriston frontoi handia, eta estalitakoa gainera. Ederki aprobetxatu genuen!

Idatzi genizuen gabonetako irteeran haur gutxi xamar azaldu zitzaizkigula, baina oraingoan ez, oraingoan jende dezente elkartu ginen Beizamara joateko. Koxkorren adarrak hala ere, lau egun hauek "Komikilandian" igaro zituen, euren mundu berezi hau bizirik mantentzeko lanetan. Izan ere, baziren pertsonaia gaizto batzuk Komikilandia suntsitu nahi zutenak...
Ekintza ugari egin genituen, betiko moduan: mugitzeko moduko jokoak, mahai-jokoak (azkarrek Monopoly bat egin zuten han bertan, Donostia bertsioa!), tailerrak, antzerkiak, gitarra jo genuen, botata egon ginen, frontoiean futbol eta pilota partida ederrak jokatu genituen... sukaldean ere aritu ginen, jaki desberdinak prestatzen: azkarrak magdalenak egiten saiatu ziren, baino arazo tekniko batzuk zirela medio (gasik gabe geratu zen herria!), ez zen guztiz posible izan; trebeek kriston takotea prestatu ziguten (gaileta, esne eta txokolatearekin egiten den postrea, oso ohikoa Aratzen), gosaltzeko jan genuen; eta oinarinek urdaiazpiko kroketak egin zituzten, izugarri goxoak atera zitzaizkienak!

Egun ederrena, hala ere, Talde Eguna izan zen, ohikoa izaten den moduan. Oraingoan urte batzuk atzera egin genituen eta Italian kokatu ginen, Mafiaren urrezko aroan. Goizean haurrek mafioso onak izango zirela frogatu behar izan ziguten froga desberdinen bidez: punteria, ihes egiteko abilezia, gorpu bat ezkutatzeko gaitasuna, itaunketa bat jasatekoa... hala, pizzeria bat aurrera ateratzeko beharrezkoak ziren gaiak lortu zituzten. Arratsaldean, ostera, banku bat lapurtu behar izan zuten, segurtasun-sistema guztiak gainditu ostean: sensoredun baldosak lurrean, segurtasun-kamerak eta azkenik laser-izpi sare bat, segurtasun-kutxara heltzeko. Hau irekitzeko zenbaki-konbinaketa lortu zutenean, euren ezkutalekura egin behar izan zuten ihes urrearekin! Azkenik, gauean familiako "Padrinoa" nork hil zuen asmatu behar izan zuten, afalorduan gertatu baitzen hilketa.

Oso egun ederrak igaro ditugu aurtengo aste santuko irteeran Beizaman, nola ez. Pena handiarekin itzuli ginen denok etxera, baino aldi berean jada ilusionatzen hasita, hurrengoa kanpaldia baita, Uztailan! Denok gaude noiz helduko zain!

Guraso irteera

2007-04-08T21:02:00.000+02:00

Aurreko astebururako egunpasa bat antolatu genuen Aratz taldekook, haur eta gurasoekin egitekoa. Asmoa Larraitzera joan eta ondoren Auzagaztelura abiatzea zen, eguerdirako itzuli eta bazkaldu ostean Larraitzen bertan antolatu genituen jolasetan aritzeko. Hala ere, asmoa eguraldiaren baitan zegoen, eta bada ezpada ere, plan alternatibo bat ere bagenuen. Hala ere, espero ez genuen gertaera bat jazo zen; etortzeko asmoa zutenen erdiak baino gehiagok azken momentuan ezezkoa esan zigun. Igande goizean oso jende gutxi bildu ginen hortaz, baina denon artean hitz egin ondoren, irteera aurrera eramatea erabaki genuen, egun osokoa beharrean goizekoa soilik bilakatuta. Euria ari zuenez, bigarren plana hartu genuen, gainera. Hala, autoetan sartu eta Abaltzisketara abiatu ginen bildutakoak.

Abaltzisketako frontoia inbaditu genuen, eta bertan aurkezpen joko batzuekin hasi genuen goiza. Izan ere, guraso askoren izenak ez dakizkigu, eta agian beraiek gureak ere ez. Izotza apurtzeko, primerako jolasak egin genituen, hortaz. Ondoren, gure parakaidas maitea atera genuen, eta honekin ere jolas ugari egin genituen. Pañuelitoaren jokoan ere aritu ginen, eta froga joko batekin jarraitu genuen, non arraultze-lasterketa, mimika eta beste zenbait gauza egin behar ziren taldeka. Hala ere, froga-jokoa bitartean, monitoreotako bik kanpin-gas bat piztu eta hamaiketakorako txokolate beroa egin zuten, bertan bustitzeko bizkotxo eta guzti eraman baikenituen. Hotz handiegia egiten ez zuen arren, denok eskertu genuen txokolatea, eta izugarri gustora hartu genuen.

Hamaiketakoaren ostean, tenisean, futbolean, gitarra jotzen, osteratxo bat egiten, kantuan... aritu ginen. Hala, eguerdia heldu zitzaigun, eta denok elkar agurtu ostean, bazkaltzera abiatu ginen, batzuk etxera, besteak han inguruko txokoren batetara. Ez zen pentsatuta genuen moduan atera, baina hala ere, argi geratu zen jende gutxi bildu arren primeran pasa daitekeela. Guraso batzuek esan zuten moduan, "urteak dira ez nintzela jolasean aritzen, baino primeran pasatu dut!". Ea hurrengoan gehiago biltzen garen eta eguraldiak laguntzen digun, orduan sekulakoa izango da eta!

Heldu Korrikari!

2007-03-26T16:49:00.000+02:00

Larunbatean pasa zen Donostiatik Korrika 15, eta nola ez, Aratz taldekook hantxe izan ginen parte hartzen! Urtero bezala, ibilbidearen zati bateak geuk eraman behar genuen lekukoa. Parma hotel ingurutik (Paseo Berriaren hasieran) Donostiako Parte Zaharrera sartu behar genuen lekukoa. Han bildu ginen monitoreak, haurrak eta zenbait guraso, lekukoa noiz helduko zain. Atzerapen pittin batekin zetorren, eta nahiz eta Paseo Berrian haize hotz xamarrak jotzen zuen, handik mugitu gabe aritu ginen denok zain, parte hartzeko irrikitan. Gainera, bitartean lekukoa nork hartuko zuen erabaki genuen; aurtengoan bi koxkor eta oinarin batek eramango zuten, Peru, Ruben eta Maddi Telletxeak.
Azkenean ikusi genuen Korrikako autoa, lekukoa eta sekulako jendetza Kursaaleko zubia gurutzatzen, eta denok bidearen alde bietan kokatu ginen, korrika hasteko prest. Autoa ia alboan genuenean, Aratz taldeak lekukoa hartu zuela iragarri zuen megafonia bidez, eta eskutik helduta han abiatu ziren Peru, Ruben eta Maddi, atzetik sekulako jende piloa zutela korrika, geu tartean!

Aurtengoan ere eman dugu geure hondar alea Korrikaren alde, datorren urtean berriro! Heldu Korrikari!

Korrika badator!!

2007-03-04T19:00:00.000+01:00

2007ko Korrika segituan helduko da guregana! Honen berri emateko, asteburu honetan Korrika Kulturala deiturikoa ospatu da Euskal Herriko herri eta hirietan, eta geuk ere hartu dugu bertan parte. Izan ere, larunbat arratsaldean taldeko adar guztiak batera elkartu ginen, eta kalean jokoak antolatu genituen, Korrika Kulturalaren egitarauaren barnean. Hasiera batean Donostiako Zuloaga plazan egitekoak ziren jokoak, baino azkenean Boulevardean antolatu genituen, kioskoaren alboan. Txikienentzat margoketa tailer bat jarri genuen martxan, marrazki ederrak egin eta aurtengo Korrika eder-eder apaintzen lagun zezaten. Eta haur koxkorrago eta gazteentzat joko desberdinak antolatu genituen. Joko hauetako asko koloretako jausgailu edota parakaidas batekin egin genituen, eta oso deigarria zenez, handik zebiltzan haur eta gazteak segituan hurbildu zitzaizkigun hura zer zen ikusi eta parte hartzera. Amaieran, gainera, Konstituzio enparantzara abiatu ginen denok, bertan antolatuta zegoen dantzaldian eta txokolatadan parte hartzeko. Amaiera gozoa eman genion arratsalde dibertigarri bati! Adi ibili denak, beraz, aurtengo Korrika badator eta!

Aurtengo ihauteriak

2007-02-20T09:49:00.000+01:00

Igaro dira aurtengo ihauteriak, eta Aratz taldean ere ospatu ditugu, urtero bezala. Larunbatean taldeko adar guztiak Ategorrietako etxean elkartu ginen, eta aurreko asteetan prestatutako mozorroak jantzi genituen. Koxkorrak aurten komikietako pertsonaia desberdinak ziren; Oinarinak, barajako kartak, nahiz eta pentsatuko duzuen bezela ez ziren baraja osoa egiteko adina haur; Azkarrak marionetaz mozorrotu ziren, gorputz adarretan sokak lotuta zihoaztela; eta Trebeak igerilariz jantzi ziren, egiten zuen eguraldia ikusita mozorro aproposena (sekulako euri jasa bota zuen!). Adar bakoitzak antzerki txiki bat edota mozorroen aurkezpen moduko bat egin zuen gainerako guztiei eskainita, eta ondoren merendola bat ospatu genuen. Tripa beteta genuela, etxe barruan joko batzuk antolatu genituen, eguraldia ez baitzen kanpoan jolasean aritzeko modukoa. Toki handiegirik ez genuen, baino azkenean denok bata bestearen gainean botata amaitu genuen arren, primeran pasa genuen jolasean. Ea datorren urterako zein mozorro prestatzen ditugun...

Gabonetako irteera

2007-01-02T09:55:00.000+01:00

Urteroko moduan, abenduaren 26tik 29ra irteera bat egin dugu Aratz taldekook. Azken bi urteetan Izurtzan igaro ditugu gabonak, Durango ondoan, baino aurtengoan etxez aldatzea erabaki dugu eta Orendainera joan gara, Alegiatik gora. Etxea zahar xamarra da, baino badu bere xarma. Gainera, ingurua paregabea du, Txindoki ikusten baita aurrez-aurre. Hori bai, etxea nahiko hotza da, eta ez du berogailurik, baino eraman ditugu estufa elektriko pare bat eta konpondu gara haiekin.

Haur gutxi azaldu zaizkigu irteerara, urteroko kontua. Gabonetan asko kanpora doaz, familiarengana, beste batzuek planak egiten dituzte, eskiatzera doaz, alferkeria sartzen zaie... Hala ere, aurtengoan oso haur gutxi azaldu zaizkigu. Momenturen batean ia haurrak bezainbeste monitore geunden! Hala ere, haur gutxi etortzeak badu bere alde polita ere. Izan ere, giroa goxoagoa da, familiartekoagoa. Haurrek denbora gehiago ematen dute monitoreokin, eta normalean baino erlazio estuagoa sortzen da denon artean. Pena da haur gutxi azaltzearena, baino dena ez da txarra.

Lagun ezkutua, opari trukeak, tailerrak, pista-jokoak, mendira txangoa (Oinarinak Auza-Gaztelura joan ziren egunpasa, sekulako eguraldiarekin. Ze inbidia!), risoterapia, gitarra sesioak, abestiak, dantzak, antzerkiak... eta futbolin partida ugari, piloa (Orendaineko etxean bada futbolin zahar bat, barrak mugitzeko kriston indarra egin behar den arren arrakasta itzela duena). Talde-eguna ere ederra izan dugu, gorputz atalen ingurukoa. Laburbilduz, betiko moduan primeran pasa dugula denok, eta nahiz eta hotza izan, gehienok gustora geratuko ginatekeela egun pare bat gehiago bertan, gure arteko giroaz gozatzen.

Urte berri on eta hurren arte, Aratz!!

Hator, hator mutil etxera...

2006-12-25T12:40:00.000+01:00

Atzo arratsean, abenduak 24, taldeko zenbait monitore eta haur Donostiako Boulevardean elkartu ginen kaletik zehar zenbait gabon kanta abesteko asmotan. Trikitilari pare bat eta panderojolea ere bagenituen, eta hiriko zentrotik zehar aritu ginen giroa pittin bat alaitzen. Baserritarrez jantzita gabon kantak abestu genituen, kalejirak egin, arin-arin eta fandangoren bat ere dantzatu genuen (giroan sartuta emozionatu egin ginen eta)... Hasieran zenbait lotsatu xamar zeuden, baino laster pasatu zitzaien, eta erreparorik gabe aritu ginen denok abesten, dantzan eta jira-biran. Oso arratsalde alaia igaro genuen, eta bizitasun pittin bat eman genien hiriko kaleei. Datorren urtean gehiago!

Aurten ere Gabonak Zuretzat

2006-12-20T20:10:00.000+01:00

Urtero bezala Udaletxeak antolatzen duen programa honen egitarauaren zati izango gara. Gertu daukagun oporraldi honetan, arratsaldeetan egiteko beste ezer hobeagorik ez baduzue, Groseko Txofreko plazan egongo gara Abenduaren 22, 23, 24 eta 30ean 16,00tik 19,00etara.

Hainbat tailer eta ekintza prestatu ditugu arratsaldeak ahalik eta era dibertigarrienean igarotzeko. Berdin du zein adinekoak zareten, bertatik pasaz gero, ez ezazue bitan pentsatu. Helburua ondo pasatzea da!

Gora gora igotzen...

2006-11-27T18:00:00.000+01:00

Iragan den larunbatean, gure taldeko Oinarinek plan berezia egin zuten beren monitoreekin. Ohikoa den moduan arratsaldeko 4:30tan Boulevardeko erlojuan geratu ordez, 4:00tan Antiguoko elizan elkartu ziren. Behin denak azaldu zirenean, Pio Baroja polikiroldegira joan ziren, eta bertan eskalatu egingo zutela azaldu zieten monitoreek. Gainera, arnesak eta sokak aseguratzen laguntzeko, beraiekin Batix (azkarren monitorea) eta Iñigo (Idoia monitorearen anaia) joan ziren, eskalatzen aritzen baitira.
Polikiroldegian bertan eskalatzeko materiala utzi zieten behar zuten guztiei (katu-oinak, arnesak, mosketoiak...), eta oinarrizko azalpen batzuk entzun ondoren, igotzeko bide bertikalak aukeratu, eta han aritu ziren txandaka oinarinak eskalatzen. Monitoreek, inbidiaz ez geratzeko, zerbait eskalatu zuten, baita ere.
Azaldu ziren 8 oinarinek primerako arratsaldea pasa zuten polikiroldegiko rokodromoan, ia ia lehengo astean Patxi Usobiagak egindakoa errepikatuaz. Ziur aski oraindik nabarituko dituzte agujetak, baino errepikatzeko irrikaz geratu zirela ziur nago.

Azkarrak "on air"

2006-11-22T10:12:00.000+01:00

Iazko azkarren adarraren enpresa udan Norjam-era joatea izan zen, bertan ospatu zen Nazioarteko Eskaut Kanpaldira. Bertan mundu osoko eskatu-gia taldeetako jendearekin elkartu ziren, eta ekintza ugaritan hartu zuten parte: kirolak, jokoak, tailerrak... Enpresa honek, halako bidaiekin gertatu ohi den moduan, anekdota eta istorio ugari sortu zituen, azkarrek sekula ahaztuko ez dituztenak.
Lehengo ostiralean, iazko azkarrak Ttan Ttakun irratian aritu ziren zuzenean hizketan, anekdota eta istorio guzti hauek kontatzen. Eurekin Norjamera joandako monitoreak ere irratian izan ziren, beraiek ere gauza ugari baitzituzten kontatzeko. Ordu eta laurden inguruko irratsaio ederra egin zuten denen artean, eta beraiek ere oso ondo pasa zuten udako bidaia ederra berriro gogora ekarriaz. Beti oroituko duzue esperientzia eder hura, azkarrak!

Eta orain, Interneten!!

2006-10-24T19:42:00.000+02:00

Ongi etorriak Aratz Gia Taldearen blog berri honetara!
Sortu berria dugun tartetxo hau gure taldearen gorabeherak kontatzeko erabiliko dugu, interesa eduki dezakeenak irakur dezan. Edozein komentario utzi nahi izanez gero ematen dugu aukera baita ere, mezu bakoitzaren azpian azaltzen den loturan klik eginda.

Gustatuko zaizuela espero dugu, eta ongi etorriak izan zaitezte berriro ere.